Starlink Afrikadaky epidemiýa ojaklarynda hemra aragatnaşyk toruny giňeldýär
Ýokary tehnologiýalar adaty ýerüsti infrastruktura netijeli işläp bilmeýän sebitlerde global ynsanperwer howpsuzlygyň esasy gurallarynyň birine öwrülýär. Ilon Maskyň SpaceX kosmos kompaniýasy tarapyndan durmuşa geçirilen taslamanyň çäklerinde täze nesil hemra aragatnaşyk enjamlarynyň 150 toplumy resmi taýdan Afrikanyň Kesellere Gözegçilik we Merkezine (Africa CDC) gowşuryldy. Bu enjamlar howlukmaç ýagdaýda Kongo Demokratik Respublikasynyň elýeterliligi çäkli welaýatlaryna ugradyldy. Maksat – Ebola gyzzyrmasy ýaly howply wirus ýokançlyklarynyň ojaklarynda işleýän lukmançylyk missiýalarynyň üznüksiz utgaşykly işini üpjün etmek.
Adatdan daşary ýagdaýlarda hemra terminallarynyň esasy artykmaçlygy olaryň ykjamlygy we gysga wagtda işe girizilip bilinmegidir. Afrikanyň jümmüş tokaýlyklarynda, öýjükli aragatnaşyk we optiki-süýümli torlar düýbünden bolmadyk ýerlerde, adaty syýahatçylyk rýukzagyna sygýan ykjam stansiýa meýdan lukmanlary tarapyndan birnäçe minudyň içinde işe taýýar edilýär. Soňra ulgam pes orbitada ýerleşýän müňlerçe hemradan ybarat tor bilen dessine baglanyşyp, durnukly we ýokary tizlikli internet hyzmatyny üpjün edýär.
Africa CDC-niň ýolbaşçylarynyň bellemegine görä, ygtybarly sanly aragatnaşyk kanalynyň bolmagy epidemiýalara garşy göreşiň taktikasyny düýpgöter üýtgedýär. Meýdan hassahanalary we göçme barlaghanalar ilkinji gezek derňew netijelerini, epidemiologik gözegçilik maglumatlaryny hem-de näsaglar bilen aragatnaşykda bolan adamlaryň zynjyry baradaky maglumatlary halkara seljeriş merkezlerine hakyky wagt tertibinde ibermäge mümkinçilik aldylar. Kosmos tehnologiýalary maglumat alyş-çalşyndaky wagt ýitgilerini aradan aýyrýar. Bu bolsa derman serişdeleriniň çalt ýetirilmegine we howply ýokanç ojaklarynyň takyk izolýasiýa edilmegine ýardam berip, ýüzlerçe adamyň janyny halas etmäge mümkinçilik döredýär.
ORIENT maglumatlary: Häzirki wagtda Starlink dünýäde iň uly we iň çalt ösýän hemra internet ulgamy hökmünde ykrar edilýär. SpaceX kompaniýasynyň orbitadaky hemralarynyň sany eýýäm 10 müňden geçdi. Ulgam dünýäniň 160 ýurdunda 12 milliondan gowrak ulanyja durnukly sanly aragatnaşyk hyzmatyny hödürleýär. 2026-njy ýylyň ahyryna çenli täze nesil Starlink V3 hemralarynyň ilkinji uçurylyşynyň amala aşyrylmagyna garaşylýar. Olar aşa agyr derejeli Starship raketa ulgamy arkaly orbita çykarylar. Täze hemralar toruň geçirijilik ukybyny ep-esli artdyrmaga, signal gijikmesini azaltmaga we global telekommunikasiýalaryň elýeterliliginde täze eýýamy açmaga gönükdirilendir.
