Kitabyň gaýdyp dolanmagy: ýazyjy Hemra Şirow okamak medeniýetini täzeden moda öwürýär
Aşgabadyň «Sungat çatrygy» taslamasy täze bir çärä badalga berdi. Çagalary goramagyň halkara güni mynasybetli meşhur türkmen ýazyjysy, şahyry we dramaturgy Hemra Şirowyň çagalar üçin niýetlenen 10 sany kitabyndan ybarat täze toplum neşir edildi. Kitaplar onluk toplum görnüşinde çykarylýar. Şeýle-de bolsa, olary aýratynlykda hem satyn almak bolýar. Ene dilinde neşir edilen bu reňkli täzelikler çagalaryň tomusky dynç alyşyny gyzykly geçirmäge kömek edýär hem-de olary telefon ekranlaryna aşa berlip gitmekden daşlaşdyrýar.
Bu kitap çäresiniň iň esasy aýratynlygy ýaş okyjynyň özbaşdaklygydyr. Neşir edijiler her bir çaganyň özüni uly adam ýaly duýup, kitaby özbaşdak satyn alyp bilmegi üçin bahalary mümkin boldugyça elýeterli derejede bellediler. Kitaplaryň bahasy şeýle bir amatly welin, islendik çaga olary öz jübüsindäki puluna satyn alyp biler.
Bu bolsa çaganyň özüne bolan ynamyny artdyrýan hakyky ýeňişdir. Çaga ilkinji gezek öz býujetini meýilleşdirmegi öwrenýär we haýsy hekaýanyň özüne has gyzyklydygyny özi saýlaýar. Özbaşdak amala aşyrylan satyn alyş zatlaryň gymmatyny has-da ýokarlandyrýar hem-de jogapkärçilik duýgusyny terbiýeleýär. Mundan başga-da, elýeterli baha sebäpli çagalar bu kitaplary dostlaryna sowgat etmäge hem höwes bildirýärler, şeýlelikde sahylyk etmegiň lezzetini öwrenýärler.
Şeýle çemeleşme zynjyrlaýyn täsir döredip, howlularda kagyz kitap okamagy täzeden moda we abraýly güýmenjä öwürdi. Häzirki zaman çagalary estetikany halaýar, şonuň üçin hem öz şahsy kitap ýygyndysyna eýe bolmak deň-duşlaryň arasynda özboluşly bäsleşige öwrüldi. Belki-de, skameýkada bilelikde tapmaça çözmek we kitap alyşmak şu tomsuň iň meşhur intellektual meýline öwrüler. Okamak indi mekdep borjy hökmünde däl-de, häzirki zaman ýaşlarynyň durmuş stiliniň bir bölegi hökmünde kabul edilýär.
Sebäbi çaga telefonda tükeniksiz lentany sagatlap aýlap oturmagyň deregine, edebi gahrymanlaryň täsin dünýäsine aralaşýar. Hemra Şyrowyň täze ýygyndysyndaky kitaplardan ýadamak bolsa örän kyn. Formatlar yzygiderli üýtgäp durýar: ýaňyja jadyly ertekiniň ýa-da mekdep durmuşy baradaky hekaýanyň gahrymanlaryna duýgudaşlyk bildirýän okyjy, birnäçe minutdan soň başga bir kitapda gyzykly tapmaçalary ýa-da gülkünç matematiki meseleleri çözmäge başlaýar. Reňkli suratlar bolsa kitaplary ilkinji bakyşdan özüne çekiji edýär.
Şeýlelikde, Hemra Şirowyň telefon ekranlaryna garşy gönükdirilen bu özboluşly «ýazyjy dildüwşügi» üstünlik gazanmaga doly ukyplydyr. Ýazyjynyň çynlakaý uly ýaşlylar edebiýatynda baý tejribesi bar bolsa-da, ol dünýä çaga gözi bilen garamak ukybyny saklap galypdyr. Onuň eserlerinde ýumşak degişme köp, dili bolsa ýeňil hem-de düşnükli. Bu ýerde içgysgynç öwüt-ündewler ýok — her bir hekaýa, erteki ýa-da goşgy kiçijik şahsy açyş hökmünde gurulýar.
Çagalar üçin niýetlenen bu kitaplar toplumynyň neşir edilmegi «Sungat çatrygy» taslamasynyň işjeň goldawy bilen mümkin boldy. Bu çäre hakykatdan hem gyzykly çagalar edebiýatynyň her bir çaga üçin elýeterli bolup biljekdigini we tomusky dynç alyşyň iň ajaýyp bezegine öwrülip biljekdigini görkezdi. Hemra Şirowyň täze kitaplaryny Aşgabadyň kitap dükanlaryndan tapyp bolýar.
Anaý Ýolbarsow
