Dört astronawtly Orion kosmos gämisi bilen amala aşyrylýan Artemis II atly uçarmanly Aý missiýasy 2026-njy ýylyň 1-nji aprelinde ABŞ-nyň Gündogar kenar wagty boýunça (Merkezi Ýewropa wagty bilen bu eýýäm 2-nji aprel) üstünlikli işe girizildi.

Orion kosmos gämisiniň uçurylyşy meýilnama laýyklykda geçirildi: Space Launch System (SLS) raketa göterijisi gämini Aýa tarap ugrukdyrylýan traýektoriýa çykardy we indi ekipaž 10 günüň dowamynda Ýeriň tebigy hemrasynyň daşyndan aýlanyp, yzyna dolanmaly bolar.

Uçurylyşdan soň güýçli raketa yzyndan uzyn tüsse yzyny galdyryp, sagatda 16 100 kilometreden gowrak tizlige ýetdi. Ýeriň atmosferasynyň çägine ýetilende, raketadan iki gapdal tizlendiriji bölünip aýryldy, şondan soň gämi kosmosa ýoluny dowam etdirdi.

Uçurylyşy synlamak üçin köp sanly adam Florida ştatynyň Kosmos kenarynyň ugrunda ýygnandy. Köpüsi NASA-nyň uçuş meýdançasynyň garşysynda, Indian derýasynyň beýleki kenarynda ýerleşýän Taýtuswil şäherindäki synlaýyş meýdançalarynda boldy, beýlekiler bolsa göni ýaýlymy onlaýn görnüşde synlady.

Orion ekipažynyň düzüminde — komandir Reid Wiseman, uçarman Victor Glover, şeýle hem missiýa hünärmenleri Christina Koch we Jeremy Hansen bar.

Victor Glover afroamerikan gelip çykyşly ilkinji astronawt hökmünde taryha girdi, Christina Koch bolsa uçarmanly Aý missiýasyna gatnaşan ilkinji zenan astronawt boldy.

Mundan ozal Artemis II missiýasynyň uçuşy birnäçe gezek yza süýşürilipdi, sebäbi öňünden ýangyç guýmak synagy wagtynda suwuk wodorodyň syzmagy ýüze çykarylypdy. Bu ýagdaý ekipažyň howpsuzlygyny üpjün etmek üçin uçurylyşyň yza süýşürilmegine getirdi.

ORIENT