Şenbe güni Aşgabatda Koreýa Respublikasynyň Türkmenistandaky Ilçihanasy tarapyndan guralan “Quiz on Korea” atly wiktorinasy geçirildi. Aşgabatda geçirilen başlangyç tapgyra Türkmenistandan Döwletmämmet Azady adyndaky Türkmen milli dünýä dilleri instituty hem-de Sejong şa adyndaky Koreý dili okuw merkezi tarapyndan 50 talyp gatnaşdy.

Bäsleşige gatnaşanlar Koreýa barada giň bilimleriniň bardygyny subut edip, çylşyrymly soraglara jogap berdiler. Bu çäre gyzykly we hyjuwly bäsleşik häsiýetine eýe bolup, tomaşaçylarda uly täsir galdyrdy. Netijede, birinji orny we 2025-nji ýylyň sentýabr aýynda geçirilmeli “Quiz on Korea” bäsleşiginiň jemleýji tapgyrynda Türkmenistana wekilçilik etmäge mümkinçilik alan talyp — Döwletmämmet Azady adyndaky Türkmen milli dünýä dilleri institutynyň talyby Aýlar Aşyrowa boldy.

Ikinji we üçünji orny eýelän talyplar hem aýratyn bellendi we Koreýa Respublikasynyň Ilçihanasy tarapyndan baýraklar bilen sylaglandy. “Quiz on Korea” — Koreýa Respublikasynyň daşary işler ministrligi hem-de Koreýanyň Ýaýlym ulgamy (KBS) tarapyndan geçirilýän halkara jemgyýetçilik diplomatiýasy maksatnamasynyň çäginde guralýan meşhur telebäsleşikdir.

Bäsleşigiň maksady — gatnaşyjylaryň Koreýa baradaky umumy bilim derejesini kesgitlemekdir. “Quiz on Korea” bäsleşiginiň jemleýji tapgyry adaty ýagdaýda Koreýa Respublikasynyň özünde geçirilýär we oňa her bir gatnaşyjy öz ýurdunyň wekili hökmünde gatnaşýar.

ORIENT