Biz ýakynlaşmagy ugur edinýäris

2025-nji ýylyň 21-nji martynda Türkmenistanyň Ermenistan Respublikasyndaky Adatdan daşary we Doly ygtyýarly ilçisi Muhammetgeldi Aýazow Ermenistanyň Saglygy goraýyş ministriniň orunbasary Lena Nanuşýan bilen duşuşdy.

Duşuşygyň barşynda lukmançylyk syýahatçylygy ulgamynda, derman senagaty önümlerini öndürmek boýunça hyzmatdaşlyk etmegiň mümkinçilikleri ara alnyp maslahatlaşyldy.

Türkmen diplomaty Saglygy goraýyş ministriniň orunbasaryna Türkmenistanyň Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy hem-de Türkmenistanda saglygy goraýyş ulgamynyň döwrebaplaşdyrylmak boýunça alnyp barylýan işler barada gürrüň berdi. Ol adamyň saglygynyň Türkmenistanda döwlet syýasatynyň ileri tutulýan ugurlarynyň biridigini belledi.

Taraplar şu ýylyň mart aýynyň ahyrynda Ýerewan şäherinde geçiriljek Ykdysady hyzmatdaşlyk boýunça türkmen-ermeni toparynyň nobatdaky mejlisine taýýarlyk işleriniň üstünde durup geçdiler we onuň dowamynda şeýle hem saglygy goraýyş pudagynda hyzmatdaşlyk etmek meseleleriniň ara alnyp maslahatlaşyljakdygyny bellediler.

Şeýle hem ilçi ministrligiň wekillerini her ýylyň oktýabr aýynda Aşgabat şäherinde geçirilýän halkara sergisine gatnaşmaga çagyrdy.

ORIENT news

Foto: Türkmenistanyň Ermenistan Respublikasyndaky Ilçihanasy tarapyndan berildi