Biz ýakynlaşmagy ugur edinýäris

19-njy martda halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkiýe Respublikasynyň ýokary derejeli wekilleri bilen birnäçe möhüm duşuşyk geçirdi, bu iki doganlyk ýurduň arasyndaky köptaraply ykdysady hyzmatdaşlygyň çuňlaşdyrylýandygynyň subutnamasy boldy. Duşuşyklar Aşgabatda geçirilen “Halkara parahatçylyk we ynanyşmak ýyly: durnukly ösüşi üpjün etmekde sebitara ykdysady hyzmatdaşlygyň orny” atly halkara maslahatyň çäginde geçirildi.

Şeýlelikde, Türkmenistanyň Halk Maslahatynyň Başlygy Türkiýe Respublikasynyň energetika we tebigy serişdeler ministri Alparslan Baýraktar hem-de “BOTAŞ” kompaniýasynyň Baş direktory Abdulwahid Fidan bilen duşuşdy. Gurbanguly Berdimuhamedow türk wekiliýetini mübärekledi we olaryň halkara foruma gatnaşmagynyň möhümdigini nygtady.

Alparslan Baýraktar pursatdan peýdalanyp, Türkiýe Respublikasynyň Prezidentiniň iberen mähirli salamyny ýetirdi we Türkmenistanyň başlangyjy boýunça 2025-nji ýylyň “Halkara parahatçylyk we ynanyşmak ýyly” diýlip yglan edilmegini belledi. Şeýle hem Gurbanguly Berdimuhamedow üçünji Antalýa diplomatiýa forumyndaky çykyşynda öňe süren başlangyçlarynyň, parasatly maslahatlarynyň möhüm ähmiýetini belledi diýip, TDH habar berýär.

Taraplar ýangyç-energetika, ulag-aragatnaşyk, maýa goýumlar pudaklarynda netijeli ikitaraplaýyn we sebit derejesindäki gatnaşyklary ösdürmek üçin ägirt uly mümkinçilikleri ara alyp maslahatlaşdylar. Gurbanguly Berdimuhamedow Türkmenistanyň ýangyç-energetika pudagyny döwrebaplaşdyrmaga, energiýa serişdelerini dünýä bazaryna ibermegiň ugurlaryny diwersifikasiýa arkaly giňeltmäge esaslanýan syýasaty barada gürrüň berdi. Türkmen halkynyň Milli Lideri ýurduň energetika pudagynda Türkiýe bilen hyzmatdaşlygy has-da işjeňleşdirmäge taýýardygyny tassyklap, türkmen tebigy gazynyň Türkiýä iberilmeginiň, şol ýerden bolsa Ýewropa ýurtlaryna çykarylmagynyň möhüm meseleleriň biridigini aýratyn nygtady. Häzirki wagtda tebigy gazy Eýranyň üstünden “swap” usuly arkaly ugratmak hakyndaky ylalaşyk şeýle hem gurulýan utgaşykly dolanyşykda işlejek elektrik stansiýasynyň işe girizilmegi bilen, elektrik energiýasyny Hazar deňziniň üstünden eksport etmek mümkinçiligi bellenip geçildi.

Şeýle hem türkmen halkynyň Milli Lideri,Türkiýäniň “Rönesans Holding” gurluşyk kompaniýasynyň müdiriýetiniň başlygy Erman Ylyjak bilen duşuşdy. Gurbanguly Berdimuhamedow ýurduň gurluşyk we senagat kuwwatyny pugtalandyrmakda möhüm goşant goşan birnäçe möhüm taslamany durmuşa geçiren bu kompaniýa bilen Türkmenistanyň uzak möhletleýin netijeli hyzmatdaşlygy belläp geçdi. Türkmenistanyň Halk Maslahatynyň Başlygy kompaniýanyň işine ýokary baha berdi we Türkmenistanyň hyzmatdaşlygy dowam etdirmäge taýýardygyny tassyklady.

Erman Ylyjak ýolbaşçylyk edýän kompaniýasyna bildirilýän uly ynam üçin tüýs ýürekden hoşallyk bildirip, “Rönesans Holdingiň” Türkmenistandaky taslamalara gatnaşmagynyň özleri üçin uly hormatdygyny belledi. Ol durmuşa geçirilen taslamalar infrastrukturany döwrebaplaşdyrmaga ýardam berýär we ilatyň ýaşaýyş-durmuş derejesini ýokarlandyrmaga saldamly goşant goşýar diýip belledi.

Şeýle hem türkmen halkynyň Milli Lideri, “Çalyk Holding” kompaniýalar toparynyň dolandyryjylar geňeşiniň başlygy Ahmet Çalyk bilen duşuşdy. Onuň dowamynda Ahmet Çalyk ýolbaşçylyk edýän kompaniýasynyň Türkmenistanda alyp barýan gurluşyk işleri barada maglumat berdi. Gurbanguly Berdimuhamedow, hyzmatdaşlygy işjeňleşdirmekde we kämilleşdirmekde Türkiýäniň iri kompaniýalarynyň, hususan-da, “Çalyk Holdingiň” eýeleýän wajyp ornuna ünsi çekdi. Kompaniýa tarapyndan gurlup ulanmaga berlen, öňdebaryjy tehnologiýalar bilen üpjün edilen saglygy goraýyş, önümçilik we energetika desgalary bellenildi. Aşgabatda “Gap Inşaat” (“Çalyk Holdingiň” düzümine girýär) kompaniýasy tarapyndan gurlup ulanmaga berlen Halkara fiziologiýa ylmy-kliniki we Halkara sagaldyş-dikeldiş merkezleri türkmen-türk gatnaşyklarynyň yzygiderli berkeýändigini nobatdaky gezek görkezdi. Ahmet Çalyk şular ýaly uly göwrümli taslamalary durmuşa geçirmekde bildirilýän uly ynam üçin hoşallygyny beýan etdi. Türkmen halkynyň Milli Lideri, türk kompaniýasynyň Türkmenistanda alyp barýan işinde öňdebaryjy tehnologiýalary ulanmagyny dowam etdirjekdigine ynam bildirdi.

Bu ýokary derejeli duşuşyklar esasy ykdysady pudaklary öz içine alýan we sebitleýin hyzmatdaşlygyň durnukly ösüşine goldaw berýän Türkmenistan bilen Türkiýäniň arasyndaky köptaraplaýyn hyzmatdaşlygyň strategiki ähmiýetini tassyklady.

ORIENT

Foto: aa.com.tr