11-nji fewralda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň ýolbaşçylygyndaky Türkmenistanyň wekiliýeti Eýran Yslam Respublikasynyň paýtagty Tährana iş sapary bilen bardy.

Şol gün türkmen wekiliýeti Eýran Yslam Respublikasynyň ýol we şäher gurluşygy ministriniň orunbasary, Ulag senagaty we ösüş kompaniýasynyň ýolbaşçysy Huşang Bazwand bilen duşuşdy diýip, DIM-niň metbugat gullugy habar berdi.

Duşuşygyň barşynda taraplar hyzmatdaşlygyň oňyn tejribesini, şol sanda eýran kompaniýalarynyň Türkmenistanyň çäginde awtomobil ýollary gurmak boýunça taslamalaryna gatnaşýandygyny bellediler. Taraplar ykdysady hyzmatdaşlyk boýunça hökümetara toparyň soňky mejlisleriniň netijeleri boýunça gazanylan ylalaşyklaryň durmuşa geçirilişini ara alyp maslahatlaşdylar.

Soňra Eýranyň nebit ministri Mohsen Paknežad bilen duşuşyk geçirildi. Ara alyp maslahatlaşmalaryň dowamynda nebitgaz pudagynda hyzmatdaşlygyň häzirki möhüm meselelerine garadylar. Iki dostlukly ýurduň bar bolan mümkinçiliklerini durmuşa geçirmek üçin giň şertleriň bardygyny bellendi.

Mundan başga-da, Türkmenistanyň wekiliýeti Eýranyň energetika ministri Abbas Aliabadi bilen duşuşyk geçirdi. Taraplar geçen ýylyň dowamynda geçirilen gepleşikleriň netijeliligini bellediler we iki ýurduň hyzmatdaşlygy işjeňleşdirmäge bolan meýillerini tassykladylar. Duşuşygyň dowamynda elektroenergetika, suw serişdelerinden tygşytly peýdalanmak boýunça hyzmatdaşlygyň häzirki ýagdaýy we geljegi ara alnyp maslahatlaşyldy.

Türkmenistanyň wekiliýetiniň Eýrana sapary dowam edýär.

ORIENT