Aşgabatda Halkara parahatçylyk we ynanyşmak ýylyna bagyşlanan maslahat geçirildi. Çäre “Halkara parahatçylyk we ynanyşmak ýyly: Türkmenistanyň halkara jemgyýetçiligi bilen hyzmatdaşlygy” ady bilen 15-nji ýanwarda, çarşenbe güni Türkmenistanyň Daşary işler ministrliginiň Halkara gatnaşyklary institutynda geçirildi. Maslahata ýurduň hökümetiniň, diplomatik wekilhanalaryň we halkara guramalarynyň ýokary derejeli wekilleri gatnaşdy.
Gatnaşanlar sebitleýin howpsuzlygy güýçlendirmek, durnukly ösüş we howanyň üýtgemegine garşy göreşmek hyzmatdaşlygy ýaly ählumumy gün tertibinde duran möhüm meseleleri ara alyp maslahatlaşdylar. Daşary işler ministri Raşid Meredow tarapyndan hödürlenen Türkmenistanyň Halkara parahatçylyk we ynanyşmak ýylynyň dowamyndaky işleriniň we onuň ileri tutýan ugurlarynyň konsepsiýasyna aýratyn üns berildi.
Ministr öz çykyşynda golaýda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen BMG-niň Baş sekretary Antoniu Guterrişiň arasynda bolan telefon arkaly söhbetdeşliginiň ähmiýetini aýratyn nygtady.
Daşary syýasat edarasynyň ýolbaşçysy ählumumy gün tertibiniň esasy meselelerine, şeýle-de özara ynanyşmak, dialog we jogapkärçilik esasynda döwletleriň tagallalaryny birleşdirmek baradaky ýurdumyzyň garaýyşlarynyň beýany bolan Türkmenistanyň Halkara parahatçylyk we ynanyşmak ýylynyň dowamyndaky işleriniň we ileri tutýan ugurlarynyň Konsepsiýasynyň üstünde aýratyn durup geçdi.
Türkmenistanyň bitarap, goşulyşmaýan we birleşmelere girmeýän ýurtlaryň şeýle-de bar bolan hem-de ýüze çykyp biljek gapma-garşylyklary çözmegiň parahatçylykly, syýasy-diplomatik usullaryna geçmek üçin şertleri döretmekde mümkinçiliklerini, tejribesini we ygtyýarlygyny birleşdirip, gapma-garşylyklara gatnaşmazlyk hem-de goşulyşmazlyk ýörelgelerine eýerýän ähli döwletleriň goldawyna garaşýandygy bellenildi.
Maslahatda şeýle hem BMG-niň Merkezi Aziýa üçin öňüni alyş diplomatiýasy boýunça sebit merkeziniň ýolbaşçysy Kaha Imnadze, BMG-niň Türkmenistandaky Hemişelik utgaşdyryjysy Dmitriý Şlapaçenko, ÝUNISEF-niň wekili Jalpa Ratna, Bütindünýä saglygy goraýyş guramasynyň ýurt boýunça edarasynyň ýolbaşçysy Ýegor Zaýsew, BMGÖM-iň hemişelik wekiliniň orunbasary Tomisa Paowiç çykyş etdiler. Maslahaty Türkmenistanyň DIM-iň Halkara gatnaşyklary institutynyň rektory Gülşat Ýusupowa alyp bardy.
Maslahata gatnaşyjylar ählumumy gün tertibiniň möhüm meselelerini çözmekde tagallalary birleşdirmäge gönükdirilen Türkmenistanyň Halkara parahatçylyk we ynanyşmak ýylynyň dowamyndaky işleriniň we ileri tutýan ugurlarynyň Konsepsiýasynyň wajyplygyny biragyzdan bellediler.
ORIENT
