Biz ýakynlaşmagy ugur edinýäris

Türkmen-eýran serhedinde ýerleşýän “Artyk” gümrük nokadynda Türkmenistanyň we Eýran Yslam Respublikasynyň serhet edaralarynyň üçünji duşuşygy geçirildi. Bu barada Türkmenistanyň Döwlet serhet gullugynyň saýtynda habar berilýär.

Duşuşyga türkmen tarapyndan Türkmenistanyň Daşary işler ministrliginiň, gümrük, serhet we migrasiýa gulluklarynyň, “Türkmenawtoulaglary” we “Türkmendemirýollary” Agentlikleriniň wekilleri, eýran tarapyndan – Dargaz şäheriniň häkimi, “Lotfabad” gümrük nokadynyň başlygy we işgärleri, serhet bölüminiň başlygy we işgärleri, şeýle hem Eýran Yslam Respublikasynyň Türkmenistandaky ilçihanasynyň wekilleri gatnaşdy.

Gatnaşyjylar Artyk we Lotfabad geçiriş ýerleriniň geçirijilik kuwwatyny we iş wagtyny köpeltmek, gümrük serhetlerinden harytlaryň bikanun geçirilmeginiň öňüni almak babatda halkara hyzmatdaşlygyny giňeltmek meselelerini ara alyp maslahatlaşdylar. Munuň bilen baglylykda, geçiriş nokatlarynda gümrük barlagyny amala aşyrmak boýunça çemeleşmeleriň bir nusga getirmek baradaky meselelere hem garaldy.

ORIENT news

Foto: customs.gov.tm