Şu gün Aşgabatda Türkmenistanyň Prezidenti Serdar Berdimuhamedowyň we Gazagystan Respublikasynyň Prezidenti Kasym-Žomart Tokaýewiň arasynda geçirilen gepleşikleriň netijeleri boýunça birnäçe resminamalara gol çekildi.

Döwlet Baştutanlary Türkmenistan bilen Gazagystan Respublikasynyň arasynda dostlugy pugtalandyrmak we köptaraply strategik hyzmatdaşlygy çuňlaşdyrmak hakyndaky Jarnama gol çekdiler.

Döwlet Baştutanlarynyň gatnaşmagynda 20 sany resminama, şol sanda 2025-2027-nji ýyllar üçin Türkmenistan bilen Gazagystan Respublikasynyň arasynda dostlugy we köptaraplaýyn strategik hyzmatdaşlygy berkitmek boýunça hemmetaraplaýyn Maksatnamasyna gol çekildi.

Iki ýurduň hökümetleriniň derejesinde Maýa goýumlary özara höweslendirmek we goramak hakynda Ylalaşyga; Jenaýatçylyga garşy göreşmekde hyzmatdaşlyk etmek hakynda Ylalaşyga; Ulag, logistika we üstaşyr babatda strategik hyzmatdaşlyk hakynda Ylalaşyga gol çekildi. Şeýle-de resminamalaryň arasynda Ýolagçylaryň we ýükleriň halkara awtomobil gatnawlary hakynda Türkmenistanyň Hökümeti bilen Gazagystan Respublikasynyň Hökümetiniň arasynda 1997-nji ýylyň 27-nji fewralyndaky Ylalaşyga üýtgetmeleri we goşmaçalary girizmek babatda Teswrinama hem bar.

Ulag-aragatnaşyk pudagynyň derejesinde özara düşünişmek barada Ähtnamalara: Türkmenistanyň Ministrler Kabinetiniň ýanyndaky Ulag we aragatnaşyk agentiliginiň we Gazagystan Respublikasynyň Ulag ministrliginiň arasynda; “Türkmenaragatnaşyk” agentliginiň we Gazagystan Respublikasynyň Sanly ösüş, innowasiýalar we aerokosmiki senagaty ministrliginiň arasynda – sanlylaşdyrma we maglumat tehnologiýa pudaklary boýunça hyzmatdaşlygy mundan beýläk-de ösdürmek barada Ähtnamalara gol çekildi.

“Deňiz söwda floty” ýapyk görnüşli paýdarlar jemgyýeti bilen “Aktau deňiz söwda porty” paýdarlar jemgyýeti arasynda hyzmatdaşlyk etmek hakynda Ähtnama gol çekildi. “Türkmenpoçta” poçta aragatnaşyk kompaniýasy bilen “Kazpoçta” paýdarlar jemgyýetiniň arasynda halkara poçta ugratmalaryny eltip bermek boýunça Ylalaşyga gol çekildi.

“Türkmengaz” Döwlet konserni bilen “QazaqGaz” kompaniýasy arasynda gaz pudagynda hyzmatdaşlygy ösdürmek hakynda Ylalaşyga gol çekildi. “Türkmennebit” Döwlet konserni bilen “КазМунайГаз” paýdarlar jemgyýetiniň arasynda hyzmatdaşlyk etmek hakynda Ähtnama gol çekildi.

Türkmenistanyň DIM-niň Halkara gatnaşyklar instituty bilen Gazagystan Respublikasynyň Prezidentiniň ýanyndaky Döwlet dolandyryş akademiýasynyň arasynda özara düşünişmek hakynda Ähtnama gol çekildi.

Şeýle-de sport, syýahatçylyk, maliýe bazarynyň ösüşi, ösümlikleriň karantini we goragy, köpçülikleýin habar beriş serişdeleri, arhiw işi boýunça resminamalara gol çekildi.

Mundan başga-da, 2025-nji ýyl üçin söwda-ykdysady, ylmy-tehniki we medeni hyzmatdaşlyk babatda Türkmenistanyň Balkan welaýatynyň häkimligi bilen Gazagystan Respublikasynyň Mangistau oblastynyň akimatynyň arasynda hyzmatdaşlygyň Meýilnamasy kabul edildi.

Resminamalaryň doly sanawy “Türkmenistan şu gün” saýtynda neşir edildi.

ORIENT news