Astanada geçirilýän Merkezi Aziýa döwletleriniň Baştutanlarynyň Sammitiniň çäklerinde wise-premýerleriň, ministrleriň we beýleki ýolbaşçylaryň derejesinde ikitaraplaýyn we köptaraplaýyn duşuşyklar geçirildi.

Şeýlelik bilen, Türkmenistanyň Ministrler Kabinetiniň Başlygynyň orunbasarlary Batyr Atdaýew we Baýmyrat Annamämmedow Gazagystan Respublikasynyň premýer-ministriniň ilkinji orunbasary Roman Sklýar bilen duşuşyk geçirdiler.

Duşuşygyň çäginde Gazagystan we Türkmenistan barada döwrebap ykdysady maglumatlaryň alyş-çalyşy bolup geçdi, bilelikdäki taslamalaryň we söwda-ykdysady gatnaşyklarynyň mümkinçilikleri hem-de energetika pudagy boýunça hyzmatdaşlyk meselelerine garaldy.

5 ýylyň dowamynda iki ýurduň arasyndaky özara söwdanyň mukdary 4 esse artdyrylyp, soňky ýylyň dowamynda 28% ýokarlandy. 2024-nji ýylyň 6 aýynyň dowamynda haryt dolanyşygy 237,2 mln $ barabar boldy.

Taraplar kabul edilen çözgütler gazak-türkmen hyzmatdaşlygynyň ähli ugurlary boýunça ikitaraplaýyn gatnaşyklarynyň ösüşine goşmaça itergi berer diýip ynam bilen bellediler.

Şeýle-de Merkezi Aziýa döwletleriniň Baştutanlarynyň VI Konsultatiw duşuşygynyň öňüsyrasynda sebitiň ýurtlary – Gazagystanyň, Gyrygyzystanyň, Täjigistanyň, Türkmenistanyň we Özbegistanyň ulag ministrleriniň 2-nji duşuşygy geçirildi.

Maslahatlaşmalaryň esasy meselesi – awtoulag we demir ýollarynyň gurulmagy bilen üstaşyr geçelgeleriň we ulag baglanyşygyň ýokarlanmagy, täze ugurlaryň açylmagy hem-de halkara howa gatnawlaryň torlarynyň giňeldilmegidir. Çäräniň netijesinde taraplaryň geljekki hyzmatdaşlygyndaky maksatlaryny berkidýän Astana beýanatyna gol çekildi.

Mundan başga-da ministrler Merkezi Aziýa döwletlerinde ulag-logistika merkezleriniň ösdürilmegi barada özara düşünişmek hakynda Ähtnama gol çekdiler. Bu resminama maýa goýumlary çekmekde, infrastrukturany ösdürmekde we ulag-logistika merkezleriniň işini ýola goýýan kadalaşdyryjy-hukuk esasyny kämilleşdirmekde oňaýly gurşawy döretmek çäklerinde ýurtlaryň hyzmatdaşlygyna gönükdirilendir.

Gol çekilen Ähtnama 2023-nji ýyulda Duşenbe şäherinde ministrleriň ilkinji duşuşygynda Merkezi Aziýada ýerüsti ulaglaryň özarabaglanyşygyny pugtalandyrmak baradaky Ylalaşygyň dowamy boldy.

Wekiliýet Astanada ýerleşdirilen Elektrowoz ýygnaýjy zawodyna baryp, ol ýerde lokomotiw gurluşygynyň önümçilik mümkinçilikleri görkezildi.

9-njy awgustda Merkezi Aziýa döwletleriniň altynjy Konsultatiw duşuşygynyň öňüsyrasynda Gazagystan Respublikasynyň Daşary işler ministrliginde Merkezi Aziýa ýurtlarynyň daşary işler ministrleriniň mejlisi geçirildi.

Mejlisiň dowamynda taraplar ýokary derejeli ulgamlaýyn syýasy dialogyň wajyplygy barada belläp geçdiler. Bu formadyň çäginde bilelikdäki hyzmatdaşlygyň netijeleri boýunça, şeýle-de sebit we dünýä gün tertibiniň möhüm meseleleri boýunça konstruktiw pikir alyşmalar geçirildi.

ORIENT news