“DevFest'23” ýene birnäçe günden geçiriler, ORIENT hem köpden bäri garaşylýan IT konferensiýasynyň spikerleri bilen okyjylary tanyşdyrmagyny dowam etdirýär. Bu sanymyzda siz Daniil Maýkowskiý, Nazar Annanazarow, Şeker Saparowa we Emir Hudaýberdiýew bilen tanyşarsyňyz.

Daniil Maýkowskiý öz ugrunda 24 ýyldan gowrak tejribesi bolan dolandyryş we marketing geňeşçisidir. Ol Türkmenistanda innowasiýa we tehnologiki telekeçilik pudagyndaky tejribesi bilen giňden tanalýar we “Startup Academy” biznes-inkubatorynyň esaslandyryjysy we müdiridir.

Daniil, döredijileriň zähmet önümleriniň diňe göz öňünde tutulan ulanyjylara ýetmegi bilen çäklenmän, eýsem maýa goýumlaryny hem üpjün etmelidigine berk ynanýar. Iň gowusy, bu önümler uly we girdejili işiň esasyna öwrülmelidir. Bu başlangyçlaryň özeni we DevFest'23-de Daniil olary döretmek we ösdürmek baradaky pikirlerini siz bilen paýlaşar.

Daniil öz çykyşynda Türkmenistanda startap kärhanalaryny döretmäge we ösdürmäge goldaw bermek üçin bar bolan mümkinçiliklere ünsi jemlär. Google-yň köpleriň bilmeýän dürli aýratynlyklary barada gürrüň berer. Daniil bu mümkinçiliklerden nädip peýdalanmalydygyny we telekeçilik işlerinde üstünlik gazanmalydygyny görkezmäge çalyşýar.

Özbaşdak işe başlamak üçin näme gerekdigi ýa-da haýsy zatlar bilen meşgullanmalydygyňyz hakda pikir eden bolsaňyz, bu bilim binýadyňyzy giňeltmek üçin iň amatly pursatdyr. Daniiliň baý tejribelerinden öwrenmek mümkinçiligini elden gidirmäň - bu tolgundyryjy çykyşa goşulyň we Google-yň berýän gurallaryny ulanyp pikirleriňizi üstünlikli başlangyçlara öwrüp boljakdygyny öwreniň.

Emir Hudayberdiýew UX/UI dizaýnynyň ussadydyr. 7 ýyldan gowrak iş tejribesi bilen, Emir Türkmenistandaky iň uly dizaýn studiýalarynyň birinde – “Caspy Creative”-da işledi we soňra “HOZ Studio” atly “döredijilik ýerini” döretdi. Karýerasyndaky syýahatynda, üstünlikli sanly önümleri döretmekde dizaýnyň ähmiýetine düşündi. Gynansagam, programma işläp düzüjiler köplenç artykmaç kynçylyga we taslamanyň “durgunlygyna” sebäp bolup biljek bu möhüm tapgyry sypdyrýarlar. Tanyşdyrylyş dabarasynda, Emir islendik taslamanyň üstünlikli bolmagyny üpjün etmek üçin dizaýn meselelerini nädip kesgitlemelidigini we dolandyrmalydygyny ara alyp maslahatlaşar. Üstünlikli dizaýnyň syrlaryny açmak isleseňiz, bu sessiýa hökman siziň üçindir!

Nazar Annanazarow çuňňur öwrenmäge hem-de amaly goşundylar üçin potensialyna höwesli bolan ýaş we zehinli IT hünärmenidir. Nazar bary-ýogy 16 ýaşynda frilansiňa başlady we dürli platformalar üçin botlary döretdi. Şondan bäri ol, özbaşdak öwrenmäge başlamak bilen, wideo rolikleriň we kitaplaryň kömegi bilen bilimini baýlaşdyryp, özüni kämilleşdirdi. Häzirki wagtda kompýuter tehnologiýasy hünäri boýunça okaýar we programmirleme başarnyklaryny ösdürmegi dowam etdirýär.

Nazaryň web-döredijilik işi, hakyky üýtgeşiklige umyt baglaýan maşynlar we çuňňur öwreniş dünýäsine syýahatynyň başlangyjydyr. Iň ýatda galan taslamasy, maýyplara has netijeli aragatnaşyk gurmak üçin yşaratlary adam diline öwürmek bilen baglanyşykly bolan işidir. Indi ol öz tejribesini we bilimlerini beýlekiler bilen, esasanam çuňňur öwrenmegi has gowulaşdyrmak üçin ony öz işine nädip goşmalydygyny öwrenmek isleýänlere paýlaşmak isleýär.

Nazaryň “Keras” gurluşy (IT-de taýýar model, programma üpjünçiligi platformasy üçin şablon) we çuňňur öwreniş baradaky gürrüňi, ähli myhmanlary ruhlandyrar we höweslendirer. Tejribeli hünärmen bolsaňyz ýa-da tehnologiýa dünýäsine ýaňy başlan bolsaňyz, Nazaryň düşünjeleri öndürijiligiňizi ýokarlandyrmak we maksatlaryňyza ýetmek üçin işiňize çuňňur öwrenmegiň näderejede goşulyp biljekdigine düşünmäge kömek eder.

Şeker Saparowa "Beg Yupek" kompaniýasynyň esaslandyryjysy we direktorydyr, ol bütindünýä boýunça önüm öndürmäge we eksport etmäge ýöriteleşendir. Şeker durnuklylygy we tebigat bilen sazlaşygy gazanmaga uly gyzyklanma bildirýän täzelikçidir. Ol kiberhowpsuzlyk teoriýalaryny we halkara gatnaşyklaryny birleşdirýän dersara gözleglerde ýöriteleşýär.

Şeker Şweýsariýanyň Dawos şäherinde geçirilen Bütindünýä ykdysady forumyna birnäçe gezek gatnaşdy. Şeýle hem ol, 2023-nji ýylda Dawosda guralan Ýewraziýa gepleşiklerine gatnaşdy. Durmuş tejribesini diňe bir girdejili däl, eýsem jemgyýet üçin hem peýdaly taslamalary döretmek üçin durmuş tejribesini nähili ulanmalydygyňyz bilen gyzyklanýan bolsaňyz, onuň "Neoteriki startap" atly çykyşyny diňlemäge geliň!

Şunuň bilen, 2023-nji ýyldaky Döredijiler festiwalynyň spikerlerini tanyşdyrmagyň dördünji neşirini tamamlanýar. “DevFest”-e ýazylyň we spikerlerimizi diňlemäge geliň!

Çäre barada has giňişleýin maglumatlary resmi GDG Ashgabat platformasynda okap bilersiňiz, bu ýerde hasap açmak arkaly täzeliklere we bileleşikdäki täzelenmelere hem ýazylyp bilersiňiz.

Öňki sanawdaky spikerler hakda aşakdaky salgylarda okap bilersiňiz:
1-nji sany;
2-nji sany;
3-nji sany.

Saparguly Mahtumow