Türkmenistanly küştçi, halkara sport ussady Saparmyrat Atabaýew Hytaýyň Sinhuandao şäherinde "Ýol we guşak" ady bilen geçirilen 3-nji halkara ýaryşda kümüş medal gazandy. Saparmyrat 4 oýunda ýeňiş gazanyp, galanlarynda deňme-deň oýnady we netijede mümkin bolan 9 utukdan 6.5 utuk toplady. Ikinji tapgyr oýunlarda Saparmyrat hatda ýaryşyň ýeňijisini-de ýeňmegi başardy. Hytaýly küştçi Hung Renji Saparmyratdan ýeňlenden soň, beýleki türgenler bilen yzly-yzyna oýunlary geçirip, 7 utuk toplady we ýaryşyň ýeňijisi boldy.

Kümüş medaldan başga-da, Saparmyrat üçünji we soňky grossmeýster kadasyna ýetdi we Elo reýtingini 2497 bal ýokarlandyrdy. Saparmyrat ýene-de 3 bal gazanyp, Elo reýtingini 2500-e ýetirip bilse, resmi taýdan “grossmeýster” adyny alar we ýurdumyzyň taryhynda onunjy grossmeýster bolar.

Bu ýaryşa Hytaýdan, Mongoliýadan, Türkmenistandan we Gyrgyzystandan 27 türgen gatnaşdy. Olaryň 8-si grossmeýster, 6-sy halkara sport ussady we 2-si FIDE ussadydyr.

Häzirki wagtda Saparmyrat 26-30-njy dekabr aralygynda Samarkantda rapid we blis usulynda geçiriljek dünýä çempionatyna taýýarlyk görýär.

ORIENT news