Germaniýa Federal Respublikasynyň ilçihanasy Germaniýanyň halkara hyzmatdaşlyk jemgyýeti (GIZ), şeýle hem Aşgabatdaky Türkmenistanyň Ylymlar akademiýasynyň Tehnologiýalar merkezi bilen bilelikde paýtagtyň ýaşaýjylaryny we myhmanlaryny «Energetiki geçiş – geljegiň energiýasy» atly göçme sergä çagyrýar. Sergi interaktiw sanly görnüşde geçiriler we tanyşmak üçin türkmen, rus, nemes, iňlis dillerinde elýeterli bolar.

Dünýäniň köp ýurtlarynda geçirilen bu sergi energetika ulgamlarynyň dekarbonizasiýa mowzugyna, şeýle hem energetiki geçişiň kynçylyklaryna we mümkinçiliklerine bagyşlanýar. Esasy üns energiýa üpjünçiligini nädip ygtybarly, elýeterli we durnukly edip boljakdygyna gönükdirilendir.

Sergä gatnaşyjylar syýasat, ylym, jemgyýet we ykdysadyýet ulgamlaryna degişli dürli garaýyşlar bilen tanyşdyrylar. Sergi geljegiň durnukly energetika ulgamy üçin tehnologik işläp düzmeler, syýasat strategiýalary we jemgyýetçilik başlangyçlary barada düşünje bermegi göz öňünde tutýar.

Sergä Türkmenistanyň Ylymlar akademiýasynyň Tehnologiýalar merkeziniň sergi zalynda 4-nji iýundan (sagat 13:00-dan) 25-nji iýuna (18:00-a) çenli baryp görüp bilersiňiz. Salgysy: Bekrewe (2211) köç., 180, 744032 Aşgabat. Zalyň işleýän wagty: duşenbeden anna gününe çenli, 09:00-dan 18:00-a çenli.

Giriş mugt, hasaba alynmak talap edilmeýär.

Aşgabatda serginiň wagty tamamlanandan soň, sergi Maryda görkeziler.

Has giňişleýin maglumatlary şu saýtda tapyp bilersiňiz www.energiewende-global.com

ORIENT news