Hytaýyň günorta-günbataryndaky Syçuan welaýatynda anna güni Duszýanýan suw goýberiş festiwaly geçirildi. Bu çäre Çendu düzlüginde ýazky suwaryşyň we tüwi nahallarynyň seçip alyş işleriniň başlanmagyny aňlatdy.

ÝUNESKO-nyň Bütindünýä mirasynyň sanawyna girýän meşhur Duszýanýan suwaryş ulgamynyň çäginde geçirilýän bu festiwal, Çendu düzlüginde sil joşgunlaryna garşy göreşiň taryhy kökleri barada gürrüň berýär.

Minszýan derýasynda mundan 2000 ýyl ozal gurlan we häli-şindi hem işleýän bu ulgam, dünýädäki iň gadymy suwaryş ulgamlarynyň biridir.

Suw goýberiş dabarasynda agaçdan ýasalan üçburç bentler aýrylan wagty, Minszýan derýasynyň dury suwy iki müň ýyldan gowrak wagtlap Çendu düzlügini suwaryp gelýän suwaryş ulgamyna akyp başlady.

Ýazky suwaryşyň möhüm döwrüne gadam basylmagy we mart aýynyň ahyryna çenli eýýäm 8 million gektar meýdanyň suwarylmagy bilen, anna günki suw goýberiliş çäresi her ýylky gyşky abatlaýyş işleriniň tamamlanandygyny we täze oba hojalyk möwsüminiň başlanandygyny aňladýar.

Talyplaryň toparlary bu sebite syýahat edýärler we däp bolan çärelere gatnaşýarlar, olaryň käbiri bolsa suwy beklemek üçin ulanylýan agaç bentleri daňmagy öwrenýärler.

Bu ýylky çäre taryhy däplere laýyklykda hem-de ýurduň köp sebitlerinde başlangyç we orta mekdep okuwçylarynyň ýazky dynç alyşlaryny hasaba almak bilen, Sinmin baýramyndan (Ata-babalary ýatlama gününden) iki gün öň, ýagny 3-nji aprelde geçirildi.