Hytaý tehnologik kompaniýasy tarapyndan işlenip düzülen kirişsiz «akylly» gitara Hytaýda hem-de daşary ýurtlarda giň meşhurlyga eýe boldy. Bu innowasion gurala ýaşlar tarapyndan «duýgy taýdan güýç berýän stansiýa» diýlip at berildi. Sebäbi ol adaty kirişleriň ýerine sensor paneller we akordlary görkezýän LED görkezijiler bilen enjamlaşdyrylandyr.

Şençžen şäherinden elektron söwda hünärmeni Çžu Haýin uzak wagtlap aýdym aýdanda özüne gitara bilen akkompanirlemek isleýärdi. Emma adaty saz gurallary üçin zerur bolan uzak we kyn türgenleşik onuň üçin örän agyr boldy. Ýakynda dostlary bilen duşuşykdan soň, ol bu kirişsiz «akylly» gitarany gördi we derrew oňa gyzyklandy.

«Mobil goşundy haýsy düwmä basmalydygyny görkezýär — diňe ýagtylygyň yzyna eýerseň bolýar. Şeýle aňsat we gyzykly bolansoň, hemmämiz haýran galdyk» - diýip, Çžu aýtdy. Bu bolsa Çžunyň duýgy taýdan isleglerini doly kanagatlandyryp, ony satyn almaga iterdi.

Bu özboluşly saz guraly Hytaýyň «dizaýn oýunjaklarynyň paýtagty» hökmünde tanalýan Şençžen şäherindäki täze nesil saz tehnologiýasy brendi bolan LiberLive tarapyndan işlenip düzüldi. LiberLive kompaniýasynyň önümçilik menejeri Li Szýasin şeýle diýdi: «Biz tehnologiýany ulanyp, çylşyrymly saz nazaryýetini ýönekeýleşdirmek we sazy hemmeler üçin elýeterli etmek isledik».

Gitaranyň içine ýerleşdirilen çip «saz beýnisi» hökmünde işleýär — ol akordlaryň yzygiderliligini hakyky wagt tertibinde seljerýär we degişli saz seslerini döredýär. Sag el üçin mediator bolsa, magnit induksiýa tehnologiýasyny ulanyp, gitarada çalynýan hereketleri gaýtalaýar.

Ilkibaşda çäkli mukdarda çykarylan bu önüm içerki hem-de halkara bazarlarda iň köp satylýan önümleriň birine öwrüldi.