Çarşenbe güni Pekinde Hytaýyň Halk Syýasy Konsultatiw Geňeşiniň (HHSKG) başlygy Wan Hunin geçen ýylda ýurduň iň ýokary syýasy konsultatiw edarasynyň öz borçlaryny ýerine ýetirmekde täze üstünlikleri gazanandygyny aýtdy.

HHSKG-niň 14-nji çagyrylyşynyň Hemişelik komitetiniň adyndan Wan Hunin Pekindäki Uly halk ýygnaklary zalynyň binasynda sagat 15:00-da açylan HHSKG-niň 14-nji çagyrylyşynyň dördünji sessiýasynda iş baradaky hasabaty hödürledi.

Wan Hunin çykyşynda “Hytaýyň Kommunistik Partiýasynyň Merkezi komitetiniň ýoldaş Si Szinpiniň ýolbaşçylygynda partiýany hem-de ähli etniki toparlarynyň halkyny birleşdirip, kynçylyklary ýeňip geçendigi we ykdysady hem-de durmuş taýdan ösüşiň esasy maksatlaryna ýetendigini aýtdy. Täze önümçilik güýçleri durnukly ösdürildi, özgertmeler we açyklyk boýunça çäreler durmuşa geçirildi, halkyň abadançylygy üpjün edildi hem-de jemgyýetçilik durnuklylygy saklandy”.

Ol 14-nji bäşýyllyk meýilnamanyň üstünlikli tamamlanandygyny aýtdy. Hytaýyň ykdysady kuwwaty, ylmy-tehniki mümkinçilikleri, goranyş ukyby we milli güýji täze derejelere ýetdi. Şeýle hem 15-nji bäşýyllyk meýilnama (2026–2030-njy ýyllar) üçin ösüş meýilnamasy işlenip düzüldi.

Mundan başga-da, Hytaý halkynyň ýapon agressiýasyna garşy alyp baran urşunda hem-de Bütindünýä antifaşistik urşunda gazanylan ýeňşiň 80 ýyllygy uly dabaralar bilen bellenilip geçildi. Bu çäre milli ruhy beýgeltdi we watançylyk duýgusyny pugtalandyrdy.

Geçen ýylda HHSKG syýasy geňeşmeler we pikir alyşmalar boýunça 98 çäre geçirdi. Umumylykda 5 müň 992 teklip kabul edildi, olaryň 5 müň 61-si garalmaga kabul edildi. Kabul edilen tekliplere jogap beriş derejesi 99,9 göterime deň boldy.

Wan geçen ýylda HHSKG-niň işiniň dört esasy ugruny aýratyn belläp geçdi:

— Hytaýyň Kommunistik Partiýasynyň ähli taraplaýyn ýolbaşçylygyny we partiýanyň Merkezi komitetiniň syýasy maslahat beriş edarasyna bitewi ýolbaşçylygyny üpjün etmek;

— HKP-niň Merkezi komitetiniň 20-nji çagyrylyşynyň dördünji plenumynyň çözgütlerini öwrenmek we durmuşa geçirmek, 15-nji bäşýyllyk meýilnamanyň taýýarlanylmagyna teklipler bermek;

— ýörite komitetleriň we dürli pudaklaryň işi arkaly konsultatiw edaranyň netijeliligini ýokarlandyrmak;

— partiýanyň öz-özüni dolandyrmak ýörelgelerini durmuşa geçirmek arkaly arassa we başlangyçly iş gurşawyny döretmek.

Şeýle hem başlyk HHSKG-niň Hemişelik komitetiniň işiniň alty esasy ugry boýunça gazanylan ösüşleri belledi:

— Si Szinpin tarapyndan öňe sürlen hytaý aýratynlyklary bolan sosializm baradaky pikirleri çuňňur öwrenmek;

— Hytaýy döwrebaplaşdyrmak we ylmy esasda karar kabul etmek üçin teklipleri taýýarlamak;

— özgertmeleri we innowasiýalary goldamak, düzgünleri standartlaşdyrmak;

— dürli partiýalaryň, etniki toparlaryň, dinleriň hem-de jemgyýetçilik gatlaklarynyň arasynda agzybirligi we raýdaşlygy, sazlaşykly gatnaşyklary pugtalandyrmak;

— beýleki ýurtlar bilen dostlukly alyş-çalyşlary ösdürmek we daşary syýasaty goldamak;

— HHSKG-niň içinde partiýa gurluşygyny pugtalandyrmak.

HHSKG-niň Milli komitetiniň 14-nji çagyrylyşynyň dördünji sessiýasy 11-nji martda tamamlanar.