Hytaýyň Senagat we maglumatlar tehnologiýasy ministrliginiň habar bermegine görä, 2021–2025-nji ýyllary öz içine alýan 14-nji Bäşýyllyk meýilnama döwründe, ýurtda senagat robotlaryny öndürmekde we içerki öndürijileriň bazardaky ornuny pugtalandyrmakda uly ösüş gazanyldy.

Agzalýan döwrüň dowamynda Hytaý senagat robotlarynyň innowasiýasyna uly üns berip, olary kämilleşdirmekde öňegidişlik gazandy. Ekranlar, servo ulgamlary we dolandyryjylar ýaly möhüm bölekleriň içerki üpjünçiligi ep-esli artdy.

2024-nji ýylda Hytaýda içerki öndürijiler tarapyndan hödürlenen robotlaryň satuwy 177 müň sana ýetdi, bu bolsa 14-nji Bäşýyllyk meýilnama döwrüniň dowamynda ortaça ýyllyk ösüş 33,1% barabar boldy diýmekdir. Içerki öndürijileriň bazardaky paýy hem 50%-den geçip, 2024-nji ýylda 58,5%-e ýetdi.

14-nji Bäşýyllyk meýilnama başlany bäri Hytaýda ornaşdyrylan senagat robotlarynyň sany dünýäniň beýleki ähli ýurtlarynyň jemi görkezijisinden hem köp boldy. Häzirki wagtda şeýle robotlar ýurduň ykdysadyýetiniň 71 sany esasy pudagynda we 241 sany kiçi göwrümli pudaklarynda ulanylýar.

2026–2030-njy ýyllary öz içine alýan 15-nji Bäşýyllyk meýilnama döwründe Hytaýda robot senagatyny emeli intellekt we beýleki täze döreýän tehnologiýalar arkaly has-da çuňlaşdyryp utgaşdyrmak göz öňünde tutulýar. Mundan başga-da, ýurduň ýöriteleşdirilen robotlary ulanýan pudaklarynyň isleglerini kanagatlandyrmak maksady bilen önümçilikde innowasiýalary we täze nesil robotlaryň ornaşdyrylmagyny çaltlandyrmak geljekde ileri tutuljak ugur bolar.