300-den gowrak modele elýeterlilik, tokenyň bahasynyň 30% arzanlamagy we günde 100 milliarddan gowrak sorag.

“CCTV+”-iň şu reportažynda muňa düşünmäge synanyşarys.

Hytaýyň telekommunikasiýa ägirdi “China Mobile” anna güni ýurtda iň köp emeli aň modelini birleşdirýän platformany işe girizdi. Bu platforma ulanyjylara 300-den gowrak esasy modele we olaryň hyzmatlaryna bir ýerden elýeterlilik üpjün edýär.

“MoMA” platformasy tabşyryklaryň talaplaryny awtomatiki seljerip we olary ýerine ýetirmek üçin üç sany saýlawyň: “bahanyň ileri tutulmagy”, “öndürijiligiň ileri tutulmagy” we “balanslaşdyrylan” görnüşleriň arasyndan iň amatly modeli akylly usulda belläp bilýär. Bu bolsa tabşyryklary az token sarp etmek we ýokary netijelilik bilen ýerine ýetirmäge mümkinçilik berýär.

Eger modelde “timeout”, tizlik çäklendirmesi ýa-da tehniki bökdençlikler ýüze çyksa, platforma hyzmatlaryň üznüksiz işlemegini üpjün etmek üçin birnäçe sekundyň içinde bökdençsiz başga bir modele geçip bilýär.

“China Mobile Communication Corporation” kompaniýasynyň bulut tehnologiýalary merkeziniň intellektual hasaplama önümleri bölüminiň ýolbaşçysy Li Li şeýle belleýär: «Ýönekeý tabşyryklar üçin biz gaty az token sarp edýän arzan bahaly modeli ulanyp bileris. Çylşyrymly tabşyryklar üçin bolsa, has köp token sarp edýän, ýöne örän akylly we kämil modele ýüz tutarys. Bu geçiş döwrüniň dowamynda platforma hiç wagt takyklygy peseltmeýär».

Häzirki wagtda platforma bir tokeniň bahasyny takmynan 30 göterim arzanlatdy we günde ortaça 100 milliarddan gowrak soragy işleýär.

Milli maglumatlar müdürliginiň berýän maglumatlaryna görä, emeli aň goşundylarynyň hakyky durmuşa ornaşmagy çaltlanýandygy sebäpli, şu ýyl tokenleriň ulanylyşy örän çalt ösüş görkezýär. Mart aýynyň ahyryndaky ýagdaýa görä, ortaça gündelik göwrüm 140 trilliondan geçdi — bu bolsa 2024-nji ýylyň ahyryndakydan müň esse köpdür.

Jogap tapyldy: bu jady däl ýa-da ýeke-täk “super-model” hem däl. Bu kimi, haçan we haýsy baha bilen tabşyryga ibermelidigini bilýän akylly dispetçerlik ulgamydyr.