Türkmenistanyň Türkiýe Respublikasyndaky ilçisi we DEİK geňeşiniň başlygy ykdysady hyzmatdaşlygy ösdürmegi ara alyp maslahatlaşdylar
14-nji maýda Türkmenistanyň Türkiýe Respublikasyndaky Ilçisi Mekan Işangulyýew Türkiýäniň Daşary ykdysady aragatnaşyklar geňeşiniň (DEİK) ýanyndaky «Türkiýe - Türkmenistan» işewürlik geňeşiniň türk böleginiň başlygy Sefa Gömdeniziň ýolbaşçylygyndaky wekiliýet bilen duşuşygy boldy.
Duşuşygyň dowamynda taraplar türkmen-türk söwda-ykdysady hyzmatdaşlygynyň häzirki ýagdaýy we ösüş mümkinçiliklerini, şeýle hem iki ýurduň işewür toparlarynyň arasyndaky hyzmatdaşlygy ýokarlandyrmak meseleleri boýunça pikir alyşdylar.
Duşuşykda Türkmenistanyň we Türkiýäniň arasyndaky ykdysady gatnaşyklary pugtalandyrmaga gönükdirilen ikitaraplaýyn işewür duşuşyklarynyň, türk öndürijileriniň haryt sergileriniň hem-de biznes forumlarynyň geçirilmegine başlangyç beren türkmen-türk işewürlik geňeşiniň işiniň ähmiýeti aýratyn bellenildi.
Şeýle hem, Türkiýäniň işewürleriniň Türkmenistan bilen has ýakyn gatnaşyklary ýola goýmak we özara bähbitli hyzmatdaşlygy yzygiderli ösdürmek ugrunda uly gyzyklanma bildirýändigini nygtap, Sefa Gömdeniz Türkmenistanda iş alyp barýan türk kompaniýalaryna berilýän kömek we giň gerimli goldaw üçin türkmen tarapyna hoşallyk bildirdi.
Mundan başga-da, taraplar iki ýurduň döwlet we hususy pudaklarynyň wekilleriniň arasynda netijeli dialogy mundan beýläk-de ösdürmegiň möhümdigini bellediler hem-de geljegi uly bolan ikitaraplaýyn taslamalary durmuşa geçirmek boýunça bilelikdäki işleriň üstünlikli dowam etdiriljekdigine ynam bildirdiler.
ORIENT
