BAE resmi taýdan OPEC-den çykýandygyny yglan etdi
Birleşen Arap Emirlikleri (BAE) Nebit eksport ediji döwletleriň guramasyndan (OPEC) we onuň giňeldilen görnüşi bolan OPEC+ düzüminden çykýandygyny resmi taýdan yglan etdi. Bu karar 2026-njy ýylyň 1-nji maýyndan güýje girýär. Şeýle ädimiň esasy sebäbi hökmünde ýurduň häkimiýet edaralary öz nebit çykaryşyny artdyrmak boýunça strategiki maksady görkezýärler.
WAM Döwlet habarlar agentliginiň berýän maglumatyna görä, bu karar ýurduň energetika syýasatynyň çuňňur seljermesinden soň kabul edildi. BAE öz mümkinçiliklerinden doly peýdalanmak maksady bilen içerki önümçiligi ösdürmek üçin maýa goýumlaryny çaltlandyrmagy meýilleşdirýär. OPEC+ çägindäki häzirki çäklendirmeler (kwotalar), BAE-niň paýynyň takmynan 13,5% bolandygyna garamazdan, indi ýurduň milli bähbitlerine laýyk gelmeýär.
Goşmaça faktor hökmünde Pars aýlagyndaky we Ormuz bogazyndaky durnuksyzlyk görkezilýär. Bu ýagdaý ýurt üçin uglewodorod üpjünçiligi boýunça has çeýe we garaşsyz hereket etmegiň zerurlygyny döredýär.
Guramadan çykandygyna garamazdan, BAE özüni «jogapkär öndüriji» hökmünde görkezmegini dowam etdirjekdigini belleýär. Nebit çykaryşynyň artdyrylmagy dünýä bazaryndaky hakyky islege laýyklykda kem-kemden amala aşyrylar.
Şeýle-de bolsa, bilermenler bu wakany OPEC+ birlikligi üçin «oňaýsyz duýduryş» diýip hasaplaýarlar, sebäbi esasy gatnaşyjylardan biriniň çykmagy dünýä nebit bahalaryna gözegçiligiň gowşamagyna getirip biler.
ORIENT
