Hytaýyň kanun çykaryjy edarasynyň başlygy Ýewropa parlamentiniň wise-başlygy bilen duşuşdy
Sişenbe güni Pekinde Hytaýyň kanun çykaryjy edarasynyň başlygy Çžao Leszi Ýewropa Parlamentiniň wise-başlygy Ýunus Omarji bilen duşuşdy.
Duşuşygyň dowamynda Ählihytaý halk wekilleriniň ýygnagynyň Hemişelik komitetiniň başlygy Çžao Leszi Hytaýyň Ýewropa bilen iki tarapyň ýolbaşçylarynyň gazanan möhüm ylalaşyklaryny durmuşa geçirmek üçin hyzmatdaşlyk etmäge taýýardygyny aýtdy. Ol taraplaryň biri-birini hyzmatdaş hökmünde görmelidigini, özara hormaty saklamalydygyny, özara bähbitli hyzmatdaşlygy ösdürmelidigini we durnukly hytaý-ýewropa gatnaşyklarynyň ösdürilmegine ýardam bermek üçin köptaraplylygy goldamalydygyny belläp geçdi.
Çžao Leszi kanun çykaryjy edaralaryň arasyndaky alyş-çalyşlaryň hytaý-ýewropa gatnaşyklarynyň möhüm bölegidigini aýtdy. Şeýle hem ol Hytaýyň Ählihytaý halk wekilleriniň ýygnagy bilen Ýewropa Parlamentiniň arasynda döredilen alyş-çalyş mehanizminiň özara düşünişmegi berkitmekde we amaly hyzmatdaşlygy ösdürmekde möhüm orun tutýandygyny nygtady.
Çžao iki tarapyň alyş-çalyşlary we hyzmatdaşlygy giňeldip, hytaý-ýewropa gatnaşyklarynyň ösüşine has uly goşant goşjakdygyna umyt bildirdi.
Öz gezeginde Ýunus Omarji Ýewropa Bileleşigi bilen Hytaýyň kanun çykaryjy edaralarynyň arasynda adaty alyş-çalyşlaryň täzeden dikeldilmeginiň hem-de gazanylan oňyn öňegidişlikleriň iki tarapyň gatnaşyklary ösdürmäge bolan syýasy erkini görkezýändigini aýtdy.
Ol Ýewropa Parlamentiniň “bir Hytaý” syýasatyna eýerýändigini hem-de açyklyk we özara hormat goýmak ruhunda Hytaýyň Ählihytaý halk wekilleriniň ýygnagy bilen dialogy güýçlendirmäge taýýardygyny belledi.
