«Mekdepler üçin FIFA futboly» maksatnamasy: Aşgabatda halkara ekspertleriň gatnaşmagynda okuw-türgenleşik sapagy geçirildi
Aşgabatda «Mekdepler üçin FIFA futboly» halkara maksatnamasynyň çäginde çagalar we ýetginjekler futbolyny ösdürmäge hem-de bedenterbiýe mugallymlarynyň usuly taýýarlygyny kämilleşdirmäge gönükdirilen okuw-türgenleşik sapagy geçirildi.
Çäre «Aşgabat» köpugurly stadionynyň merkezi meýdançasynda geçirilip, oňa Türkmenistanyň Futbol federasiýasynyň, Bilim ministrliginiň wekilleri, şeýle-de ýurdumyzyň orta mekdepleriniň bedenterbiýe mugallymlary gatnaşdy. Türgenleşik işine dürli sport klublaryndan ýaş futbolçylar çekilip, bu bolsa ýaryş şertlerine golaý ýagdaýda toparlaýyn özara hereketleri işläp taýýarlamaga mümkinçilik berdi.
Sapaga FIFA-nyň halkara ekspertleri gatnaşdy. Maksatnamanyň dowamynda gatnaşyjylar ýaş türgenleri taýýarlamagyň döwrebap çemeleşmeleri, oýnuň tehniki we taktiki elementlerini öwretmegiň häzirki zaman usullary, şeýle hem mekdep gurşawynda okuw-türgenleşik işini guramagyň ýörelgeleri bilen tanyşdylar.
Çäräniň dowamynda amaly bölege aýratyn üns berildi. Meşhur futbol hünärmeni we dünýä çempiony Hristo Stoiçkow taktiki taýýarlygyň esasy ugurlaryny tanyşdyrdy, oýun modellerini hem-de futbolçylaryň şahsy ussatlygyny ösdürmegiň usullaryny görkezdi.
Aýratyn bölüm halkara ekspertler bilen bedenterbiýe mugallymlarynyň arasynda hünär tejribesini alyşmaga bagyşlandy. Gatnaşyjylar sport taýýarlygynyň netijeliligini ýokarlandyrmaga hem-de okuwçylaryň futbola bolan gyzyklanmasyny ösdürmäge gönükdirilen häzirki zaman pedagogiki usullary ornaşdyrmak boýunça maslahatlary aldylar.
«Mekdepler üçin FIFA futboly» maksatnamasy Türkmenistanyň Futbol federasiýasy we Türkmenistanyň Bilim ministrligi tarapyndan bilelikde durmuşa geçirilýär. Onuň esasy maksatlary ýaşlaryň arasynda futboly wagyz etmek, toparlaýyn iş başarnyklaryny kemala getirmek, liderlik häsiýetlerini ösdürmek, şeýle hem sagdyn durmuş ýörelgelerini öňe sürmekden ybaratdyr.
Maksatnamanyň çäginde okuw prosesine usuly taýdan goldaw bermek hem göz öňünde tutulýar. Muňa mugallymlar üçin okuw materiallarynyň we amaly gollanmalaryň üpjün edilmegi girýär, bu bolsa mekdep futbolynyň yzygiderli ösdürilmegine we bilim edaralarynda sport taýýarlygynyň hiliniň ýokarlanmagyna ýardam berýär.
ORIENT
