Güýzde Aşgabatda «Tatar kyzy» halkara bäsleşiginiň jemleýji tapgyry geçiriler
2026-njy ýylyň oktýabr aýynda Aşgabat «Tatar kyzy» halkara bäsleşiginiň jemleýji tapgyryny kabul eder. Oňa taýýarlyk görmek işleri barada 15-nji aprelde Türkmenistanyň DIM-niň orunbasary Ahmet Gurbanow bilen Russiýa Federasiýasynyň Tatarystan Respublikasynyň Premýer-ministriniň orunbasary Wasil Şaýhraziýew ara alyp maslahatlaşdylar.
Türkmen paýtagtynyň estafetany Orenburgdan kabul etmegi tötänden däldir. Bäsleşigiň düzgünlerine görä, final geçen ýylky ýeňijiniň dogduk mekanynda geçirilýär. 2025-nji ýylda täji Türkmenistandan Alsu Rafikowa gazandy. Daşoguzdan himiýa mugallymy täje we ýeňiji diýen ada mynasyp bolup, baş baýragy – awtoulagy aldy.
Öňde boljak waka – 18 ýaşdan 27 ýaş aralygyndaky gatnaşyjylar diňe bir sahna ussatlygyny däl, eýsem tatar dilini, däp-dessurlaryny we aşhanasyny baradaky çuňňur bilimlerini görkezjek medeniara dialog üçin ajaýyp meýdança bolup durýar.
Tatarystanda sebitleýin tapgyrlar eýýäm başlandy — halkara sahnasyna gatnaşmak üçin arzalar 5-nji iýula çenli kabul edilýär. Kazanda geçirilen ýarym finaldan soň iň gowulary «Tatar Kyzy 2026» ady ugrunda bäsleşmek üçin Aşgabat şäherine geler. Türkmen tarapy, halkara ynsanperwerlik başlangyçlaryny kabul ediji merkez hökmünde ýurduň derejesine ünsi çekip, çäräniň iň ýokary derejede guramaçylygyny üpjün etjekdigini tassyklady.
Wasil Şyhraziýewiň Aşgabada saparynyň maksatnamasyna şeýle hem, Türkmenistan Ministrler Kabinetiniň Başlygynyň orunbasary Bahar Seýidowa, Türkmenistanyň Medeniýet ministri Atageldy Şamyradow, Türkmenistanyň Bilim ministri Jumamyrat Gurbangeldiýew, Halkara gatnaşyklar institutynyň “Diplomatik protokoly” okuw merkeziniň ýolbaşçysy Berdiniýaz Mätiýew, Russiýa Federasiýasynyň Türkmenistandaky Adatdan daşary we Doly ygtyýarly ilçisi Iwan Wolynkin, suratkeş Kamil Weliahmedow we Türkmenistanda ýaşaýan tatarlar bilen duşuşyklar girdi.
