Hywada “Merkezi Aziýa – Germaniýa” birinji bilermenler forumy geçiriler
16–17-nji aprelde Özbegistanyň gadymy Hywa şäheri özüniň formaty boýunça täze we abraýly çäräni — Merkezi Aziýa ýurtlarynyň we Germaniýanyň bilermenleriniň birinji forumyny kabul eder. Bu duşuşyk 2024-nji ýylyň güýzünde Astanada geçirilen sammitde döwlet Baştutanlary tarapyndan öňe sürlen başlangyçlaryň iş ýüzündäki beýany bolar.
Hywadaky forumyň baş maksady — hemişelik işleýän bilermenler platformasyny döretmekdir. Bu syýasy ylalaşyklary anyk hasaplamalar we taslamalar bilen baýlaşdyrmaga gönükdirilen “Merkezi Aziýa + Germaniýa” formatyndaky özboluşly «akyl merkezi» bolar.
Ara alyp maslahatlaşmalara öňdebaryjy seljeriş institutlarynyň ýolbaşçylarynyň, alymlaryň we işewür toparlaryň wekilleriniň 50-den gowragy gatnaşar. Forumda Türkmenistana ýurduň öňdebaryjy bilermenleri wekilçilik ederler, olaryň wezipesi bolsa — milli bähbitleri Germaniýa Federatiw Respublikasy bilen sebitleýin hyzmatdaşlygyň umumy strategiýasyna utgaşdyrmakdan ybaratdyr.
Forumyň konsepsiýasyna laýyklykda, hyzmatdaşlyk üç ugur esasynda ýola goýlar:
Energetika we «ýaşyl» geçiş: Türkmenistanyň energetika döwleti hökmündäki derejesini nazara alyp, energiýany öndüriji pudaklary döwrebaplaşdyrmaga, gaýtadan dikeldilýän energiýa çeşmeleri we wodorod energetikasy ulgamynda nemes tehnologiýalaryny ornaşdyrmaga aýratyn üns berler.
Ulag ulgamynyň özara baglanyşygy: Orta geçelgäni ösdürmek we logistiki merkezleri döwrebaplaşdyrmak. Bu ýerde bilermenler sebitleriň arasyndaky “infrastruktura tapawudyny” nähili azaltmalydygyny ara alyp maslahatlaşarlar.
Adam maýasy: Germaniýa ýokary taýýarlykly hünärmenlere gyzyklanma bildirýär, Merkezi Aziýa bolsa bilim standartlarynyň geçirilmegine garaşýar. Dual bilim (nazaryýet we tejribe utgaşykly) maksatnamalaryny hem-de tertipleşdirilen zähmet migrasiýasyny maslahatlaşmak meýilleşdirilýär.
Aşgabat üçin Hywa forumyna gatnaşmak — milli ösüş maksatnamalaryny Germaniýanyň tehnologik mümkinçilikleri bilen utgaşdyrmak üçin mümkinçilikdir. Bilermenler syýasy ynamy nähili edip senagat kooperasiýasyna we IT-infrastrukturasyna gönükdirilýän göni maýa goýumlaryna öwrüp boljakdygyny ara alyp maslahatlaşarlar.
Duşuşyk geçirilýän ýere taryhy arabaglanyşyk hem özboluşly simwoliki many berýär: Horezm oazisi (wahasy) taryhy taýdan medeniýetleriň utgaşýan ýeri bolupdyr, muňa nemes jemgyýetleriniň tejribesi hem öz täsirini ýetiripdir. Şu günki günde bu taryhy esas uzak möhletleýin we amaly hyzmatdaşlygy gurmak üçin binýat bolup hyzmat edýär.
