Halkara Nebit we gaz uniwersitetinde «Eksport – global bazarlaryň gapysy» atly açyk sapak geçirildi
28-nji martda Halkara Nebit we gaz uniwersitetinde halkara söwda boýunça bilermen Azat Annadurdyýewiň gatnaşmagynda “Eksport – global bazarlaryň gapysy” atly açyk sapak üstünlikli geçirildi. Bu barada TBM habar berýär.
Açyk sapagyň dowamynda eksportyň ykdysady ösüşdäki ähmiýeti, daşary ýurt bazarlaryna çykmagyň mümkinçilikleri we häzirki zaman şertlerinde telekeçiler üçin döredilýän mümkinçilikler barada giňişleýin çykyş etdi. Şeýle hem ol halkara söwda ulgamynda toplan tejribesini paýlaşyp, ýaşlara öz işini ösdürmekde möhüm maslahatlary berdi.
Çärä uniwersitetiň talyplary, ýaş telekeçiler hem-de mugallymlar işjeň gatnaşdylar. Gatnaşyjylar eksport bilen bagly sowallar bilen ýüzlenip, tejribeli bilermenden amaly jogaplary aldylar. Bu bolsa açyk sapagyň özara pikir alyşma we tejribe paýlaşma meýdançasyna öwrülendigini görkezdi.
Çäräniň ýokary derejede guralmagynda Türkmenistanyň Bilim ministrligi, Halkara Nebit we gaz uniwersiteti, TSTP-niň Aşgabat şäher komitetiniň ýanyndaky “Ýaş telekeçiler” merkezi hem-de TMÝG-niň Maglumat, maslahat beriş we meýletinçilik hereketiniň işleri boýunça Merkezi hyzmatdaşlyk etdiler.
Açyk sapak ýaşlaryň telekeçilik ukyplaryny ösdürmekde, halkara bazarlara bolan gyzyklanmasyny artdyrmakda we olaryň dünýä derejesindäki ykdysady gatnaşyklaryna işjeň gatnaşmagyna itergi bermekde möhüm ähmiýete eýe boldy. Şeýle çäreleriň dowamly geçirilmegi talyplaryň bilim derejesini ýokarlandyrmak bilen bir hatarda, olaryň geljekde üstünlikli hünärmenler bolup ýetişmegine uly goşant goşýar.
ORIENT
