ZGC forumy dünýäniň dürli ýerlerinden alymlary geljekki senagat ugurlaryny öwrenmek üçin birleşdirýär
Dowam edýän “Çžunguansun 2026” (ZGC) forumy öňdebaryjy tehnologiýalary görkezmek, pikir alyşmak, syýasy çözgütleri kabul etmek hem-de halkara alyş-çalyş we hyzmatdaşlygy ösdürmek üçin möhüm platforma bolup hyzmat edýär.
Esasy maksatnamadan başga-da, bäş günüň dowamynda dolandyrylýan ýadro sintezi, emeli aň, “beýni–kompýuter” interfeýsleri, fiziki (embodied) intellekt ýaly öňdebaryjy ugurlara bagyşlanan takmynan 60 sany paralel forum geçirilýär. Takmynan 30 halkara guramasynyň gatnaşmagy bilen dürli ugurlaryň arasynda pikir we tehnologiýa alyş-çalşy köp gatnaşyjylara ylham berdi. Arakesmede Halkara termoýadro energiýasy guramasynyň (ITER) inženerçilik bölüminiň ýolbaşçysy Alen Bekule robot bilen söhbetdeş boldy. Ol şeýle tehnologiýalaryň daşky gurşawyň aşa agyr şertleri sebäpli uzakdan dolandyrmagyň möhüm bolan termoýadro energetikasynyň ösüşinde uly orun eýeläp biljekdigini belledi.
“Bu örän täsirli we, şübhesiz, innowasiýa gönükdirilendir diýip pikir edýärin. Hususan-da termoýadro sintezi meni gyzyklandyrýar, sebäbi ol innowasiýalary we ýokary tehnologiýalary özüne çekýär. Men robotlary, emeli aňy we ş.m. gördüm — bularyň hemmesi bize zerur. Bu aşa çylşyrymly zat däl. Bu ösüş üçin bize zerur, sebäbi termoýadro birleşmesi örän agyr gurşawdyr. Ol işläp başlanda, adamzata üçin ol gönüden-göni elýeterli bolmaz. Şonuň üçin biz robotlary we uzakdan dolandyryş mümkinçiliklerini ösdürýäris, şeýdip şeýle desgalary dolandyryp bileris,” -diýip, alym aýtdy.
Beýik Britaniýaly syýasy analitik forumyň Hytaý bilen Beýik Britaniýanyň arasynda hyzmatdaşlyk üçin mümkin bolan ugurlary görkezendigini aýtdy.
“Soňky döwürde men kwant hasaplaýyş ulgamyna aýratyn üns berýärin, sebäbi bu biziň iki ýurdumyz üçin geljekde hyzmatdaşlyk edip boljak ugur diýip hasaplaýaryn. Häzirki wagtda köp daşary ýurt kompaniýalary Hytaýda ylmy-barlag merkezlerini döredýär we soňra önümlerini beýleki ýurtlara, şol sanda öz içerki bazarlaryna eksport edýär,” - diýip Hytaý–Britaniýa işewürlik geňeşiniň analitigi Li Musýuan aýtdy.
Şol bir wagtyň özünde, Viking Cruises kompaniýasynyň Aziýa bazarlary boýunça ýerine ýetiriji direktory Tomas Ruç görkezilen tehnologiýalaryň köpüsiniň kruiz pudagynda hem iş amallaryny gowulandyrmak hem-de ýolagçy hyzmatynyň hilini ýokarlandyrmak üçin ulanylyp bilinjekdigini aýtdy.
“Men gämi gurluşygynda işleýärin, umman we derýa kruiz gämileri bilen meşgullanýaryn. Häzirki wagtda gämilerde müşderi hyzmatyndan başlap ekologiýa görkezijilerine çenli köp täze tehnologiýalar ornaşdyrylýar. Şonuň üçin bu tehnologiýalar meni örän gyzyklandyrýar,” - diýip, Ruç aýtdy.
Forumyň ýokary derejeli maslahatlaryndan başlap tehnologiýa görkezilişlerine çenli halkara gatnaşyjylaryň işjeň gatnaşmagy hytaý innowasiýalarynyň dünýä derejesindäki täsiriniň artýandygyny görkezýär.
2007-nji ýylda “Innowasiýa we ösüş” diýen hemişelik şygar bilen döredilen ZGC forumy häzirki wagtda global ylmy-tehniki innowasiýalary öňe sürýän açyk we ýokary derejeli platforma öwrüldi.
2026-njy ýylyň ZGC Forum-ynyň ýyllyk maslahaty 25–29-njy mart aralygynda geçiriler hem-de 100-den gowrak ýurt we sebitden müňlerçe gatnaşyjyny jemlär.
