Türkmenistanyň bilim ministri we ÝUNESKO-nyň başlygy Parižde emeli aňyň ornaşdyrylmagy barada maslahatlaşdylar
25-nji martda Pariž şäherinde ÝUNESKO-nyň ştab-kwartirasynda Türkmenistanyň bilim ministri Jumamyrat Gurbangeldiýewiň guramanyň Baş direktory Haled Al-Enany bilen möhüm duşuşyk geçirildi. Bu barada Türkmenistanyň Bilim ministrliginiň resmi saýtynda habar berilýär.
Taraplar hyzmatdaşlygyň täze ugurlaryny kesgitlediler, aýratyn-da sanly özgertmelere we emeli aň tehnologiýalarynyň okuw işine giňden ornaşdyrylmagyna aýratyn üns berdiler.
Duşuşygyň dowamynda bilim ministri ÝUNESKO bilen hyzmatdaşlygyň ýurdumyz üçin ileri tutulýan ugurlaryň biri bolup durýandygyny belledi. Bilelikdäki başlangyçlar milli bilim ulgamyny yzygiderli pugtalandyrmaga we ony dünýä giňişligine goşulyşmagyna mümkinçilik berýär.
Aýratyn üns ÝUNESKO-nyň «Sanly ylym» atly täze kafedrasyny açmagyň mümkinçiliklerine gönükdirildi. Bu kafedra ýokary tehnologiýalar we häzirki zaman ylmy-barlag usullary boýunça hünärmenleri taýýarlamak üçin esas bolar.
Baş direktor Haled Al-Enany Türkmenistanda alnyp barylýan özgertmelere ýokary baha berdi. Ol olaryň ulgamlaýyn häsiýetini we BMG-niň durnukly ösüş maksatlaryna doly laýyk gelýändigini nygtady.
ÝUNESKO-nyň ýolbaşçysy ýurdumyzda Assosirlenen mekdepleriň we akademiki torlaryň üstünlikli işini belläp geçdi. «Ömürboýy bilim almak» başlangyjy we Aşgabat şäheriniň ÝUNESKO-nyň Öwrenýän şäherleriň global toruna gatnaşmagy aýratyn ara alnyp maslahatlaşyldy.
Duşuşygyň ahyrynda taraplar täze taslamalary işe girizmäge taýýardyklaryny tassykladylar. Bu taslamalar ýokary hilli bilimlere elýeterliligi giňeltmäge we Bilimde maglumat tehnologiýalary boýunça ÝUNESKO-nyň institutlary bilen hyzmatdaşlygy ösdürmäge gönükdiriler.
ORIENT
