«Türkmengaz» bilen «CNPC» «Galkynyş» gaz känini özleşdirmegiň 4-nji tapgyryna girişýärler
Türkmenistanda «Galkynyş» gaz känini özleşdirmegiň täze giň gerimli tapgyryna badalga berildi. Anna güni, 20-nji martda geçirilen Hökümet mejlisinde Prezident Serdar Berdimuhamedow Karara gol çekdi. Resminama laýyklykda, «Türkmengaz» döwlet konserni Hytaýyň «CNPC Amudarya Petroleum Company Ltd.» kompaniýasy bilen şertnama baglaşmaga ygtyýar berildi.
Şertnama gaz känini özleşdirmegiň 4-nji tapgyrynyň çäginde desgalaryň taslamasyny düzmegi we olary doly gurmagy göz öňünde tutýar. Esasy maksat — her ýylda 10 milliard kub metr harytlyk gazy taýýarlamakdan ybaratdyr. Taslama, şeýle hem şonça möçberde gazyň çykarylmagyny üpjün etmek üçin zerur bolan ulanyş guýularyny burawlamagy we abadanlaşdyrmagy öz içine alýar.
Resminamanyň taýýarlanmagy türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ýakynda HHR-e amala aşyran saparynyň gönüden-göni netijesi boldy.
Döwlet Baştutanynyň Ministrler Kabinetiniň mejlisinde belleýşi ýaly, bu taslamanyň amala aşyrylmagy ýurduň energetika pudagynyň eksport kuwwatyny has-da artdyrmaga, täze iş orunlarynyň döredilmegine hem-de strategik häsiýetli türkmen-hytaý hyzmatdaşlygyna güýçli itergi bermäge mümkinçilik döreder.
Prezident Serdar Berdimuhamedow Pekinde gazanylan ylalaşyklaryň nebitgaz pudagyndaky gatnaşyklary täze derejä çykarýandygyny hem-de energiýa serişdelerini iberilişiniň uzak möhletleýin durnuklylygyny üpjün edýändigini nygtady.
