Mekdep okuwçylary üçin täze okuw tertibi ýakyn wagtda «Alisa AI» bilen elýeterli bolar
«Yandex»-da «Alisa AI» arkaly täze okuw formaty synagdan geçirilýär. Indi matematika meselesini girizen mahaly, neýrotor ulanyja meselä düşünmäge kömek eder — ugrukdyryjy soraglary berer we çözmegiň ýörelgelerini düşündirer.
«Okuw tertibini synap görüň» düwmesine basylanda, ulanyjy emeli aň bilen söhbetdeşlige girer. Neýrotor tabşyrygyň çözgüdiniň logikasyny düşündirer we bilimi berkitmek üçin şuňa meňzeş mysallary hödürlär. Dialogda el bilen ýazgy girizmek üçin meýdança hem-de formulalar üçin kalkulýator bolar, bu bolsa okuw prosesini interaktiw we düşnükli eder.
Bu funksiýa heniz işlenip taýýarlanýar we ýakyn wagtda «Alisa AI»-niň esasy çatynda elýeterli bolar. Ol ýerde «Yandex» kompaniýasynyň täze uly dil modeli esasynda işlär.
«Biz emeli aňy hem okuwçylar, hem-de ene-atalar üçin peýdaly repetitor hökmünde görýäris. Emma emeli aň mugallymlaryň ornuny tutmaýandygyna düşünmeli. Ol tabşyryklary seljermäge, başarnyklary ösdürmäge we synaglara taýýarlanmaga kömek eder», — diýip «Yandex» kompaniýasynyň bilim boýunça direktory Darýa Kozlowa belledi.
