Bilermen: Aşgabat Pekini sebitde durnuklylygyň we ösüşiň kepili hökmünde görýär
Ýewraziýada hyzmatdaşlygyň täze arhitekturasy kemala gelýär we Türkmenistan bilen Hytaýyň arasyndaky gatnaşyklar onuň möhüm bölegine öwrülýär. Aşgabat Pekini diňe bir türkmen gazynyň esasy alyjysy däl-de, eýsem sebitdäki durnuklylygyň we ösüşiň kepili hökmünde hem görýär.
Bu barada Türkmenistanyň Tebigy gaz ylmy-barlag institutynyň ylmy işgäri biziň teleýaýlymymyza beren interwýusynda mälim etdi. Bitewi ykbal konsepsiýasynyň iki döwletiň syýasatdaky, ykdysadyýetdäki we medeniýetdäki bähbitlerini nähili birleşdirýändigi barada — bilermeniň teswirlemesinde bellenilýär.
“Türkmenistan bilen Hytaýyň arasyndaky Bitewi ykbal jemgyýeti — bu iki ýurduň arasyndaky barha çuňlaşýan hyzmatdaşlygy we özara arabaglanşygy şöhlelendirýän konsepsiýadyr. Ol Türkmenistanyň we Hytaýyň bähbitleriniň biri-biri bilen berk baglydygyny, taraplaryň umumy maksatlara ýetmek hem-de umumy wezipeleri çözmek üçin bilelikde işlemelidigini aňladýar.
Bu konsepsiýa ikitaraplaýyn gatnaşyklaryň dürli ugurlarynda, şol sanda syýasy gatnaşyklarda öz beýanyny tapýar; taraplar özygtyýarlylyk, howpsuzlyk we ösüş meselelerinde biri-birini goldaýarlar. Hytaý tarapy Türkmenistanyň berýän goldawyna ýokary baha berýär. Şeýle hem ykdysady hyzmatdaşlyk barada aýdylanda, Hytaý Türkmenistanyň möhüm söwda hyzmatdaşydyr we iki döwlet hem söwda-ykdysady gatnaşyklary giňeltmäge, bilelikdäki taslamalary hem-de maýa goýumlaryny amala aşyrmaga çalyşýar.
Mundan başga-da, medeni-ynsanperwer alyş-çalyşlar arkaly bilim, ylym, medeniýet we syýahatçylyk ulgamlaryndaky gatnaşyklar berkeýär. Umuman alanyňda, bu konsepsiýa Türkmenistan bilen Hytaýyň arasyndaky gatnaşyklaryň strategiki häsiýetini we dürli ugurlarda uzak möhletleýin hem-de özara bähbitli hyzmatdaşlyga bolan maksatlary nygtaýar” – diýip, Türkmenistanyň Tebigy gaz ylmy-barlag institutynyň ylmy işgäri Jahan Babamyradowa belledi.
