2026-njy ýylyň başynda Ýanszy derýasynyň deltasy sebitinde söwdanyň rekord derejede ösüşi hasaba alyndy
2026-njy ýylyň başynda Hytaýyň gündogarynda ýerleşýän Ýanszy derýasynyň deltasy sebitinde söwda görkezijileriniň işjeň ösüşi hasaba alyndy. Soňky maglumatlara görä, haryt dolanyşygynyň möçberi 3 trillion ýuana ýetip, rekord derejesine çykdy. Bu bolsa takmynan 435 milliard ABŞ dollaryna barabardyr. Şeýle netije ýylyň ilkinji iki aýynda ýurduň umumy daşary söwdasynyň 38,8 göterimini üpjün etdi.
Gümrük statistikasy Szýansu, Çžeszýan, Anhoý welaýatlarynda we Şanhaý şäherinde ynamly ösüşiň dowam edýändigini tassyklaýar. Degişlilikde bu sebitlerde söwda dolanyşygy 1,03 trillion ýuan, 989,01 milliard ýuan, 183,56 milliard ýuan we 796,57 milliard ýuan boldy. Şeýle hem bu ýerlerde eksport we import görkezijileri geçen ýyl bilen deňeşdirilende 17-den 29 göterime çenli artdy.
Şeýle hem global ykdysady gatnaşyklarynyň giňelýändigini bellemek gerek. ASEAN ýurtlary, Ýewropa Bileleşigi hem-de «Bir guşak, bir ýol» başlangyjyna gatnaşýan döwletler bilen söwda 20 göterimden gowrak ýokarlandy.
Haryt dolanyşygynyň gurluşy hem kem-kemden gowulaşýar. Hususan-da, awtoulaglaryň we litiý-ion batareýalarynyň eksporty degişlilikde 77,9 we 37,6 göterim artdy.
Szýansu welaýaty ýerli transformator öndürijilerine dünýä bazarlaryna çykmaga işjeň goldaw berýär. Şeýle kärhanalaryň arasynda «Szýansu Huapen» kompaniýasy hem bar. Onuň önümleri dünýäniň 100-den gowrak ýurduna eksport edilýär.
Kärhananyň baş direktorynyň orunbasary Çžu Şanşan ilkinji iki aýyň dowamynda kompaniýanyň öz eksportynyň 77,4 göterim ýokarlanandygyny habar berdi.
Häzirki wagtda Çançžou şäherinde şeýle enjamlary eksport edýän 70-den gowrak kärhana işleýär. Ýerli häkimiýet edaralary gümrük amallaryny çaltlandyryp we logistika şertlerini gowulandyryp, işewürligi goldaýarlar.
Gümrük gullugynyň wekili Li Bonyň aýtmagyna görä, şeýle çäreler harytlaryň portlarda saklanýan wagtyny ep-esli gysgaltmaga we önümleriň daşary ýurt bazarlaryna iberilýän möçberini artdyrmaga mümkinçilik berdi. Ýylyň ilkinji iki aýynda bu şäherden eksport edilen transformatorlaryň möçberi 650 million ýuandan geçdi. Bu bolsa geçen ýyl bilen deňeşdirilende 70 göterim köpdir.
