«Türkmenistan» awiakompaniýasy Dubaýa we Jidda howa gatnawlaryny togtatdy
Türkmenistanyň milli awiakompaniýasy halkara uçuşlaryň tertibine gyssagly üýtgetmeler girizilendigi barada habar berdi. Sebitiň howa giňişligine girizilen çäklendirmeleri nazara alyp hem-de töwekgelçiliklere berlen baha esasynda, iki ugur boýunça amala aşyrylýan uçuşlar 2026-njy ýylyň 2-nji martyndan 4-nji martyna çenli togtadyldy.
Üýtgetmeler aşakdaky ugurlara degişli:
• Aşgabat — Dubaý — Aşgabat
• Aşgabat — Jidda — Aşgabat
Bu karar Ýakyn Gündogarda 28-nji fewralda başlan harby-syýasy ýagdaýlaryň ýitileşmegi zerarly kabul edildi. Sebitiň birnäçe ýurtlarynyň howa giňişliginde dowam edýän işjeň harby hereketler we oňa garşy görülýän çäreler sebäpli, halkara awiakompaniýalarynyň we awiasiýa edaralarynyň köpüsi raýat uçar gatnawlarynyň howpsuzlygyny üpjün etmek maksady bilen, howa geçelgelerini ýapmak ýa-da uçuş ugurlaryny üýtgetmek barada karar kabul etdiler.
«Türkmenistan» awiakompaniýasy ýolagçylaryň howpsuzlygynyň iň ileri tutulýan ugurdygyny nygtaýar. Meýilnamalarynda bökdeçlik dörän ýolagçylar üçin aňrybaş derejede amatly şertler göz öňünde tutuldy: awiabiletlerini tutumsyz ýagdaýda doly yzyna gaýtaryp bilerler ýa-da iň ýakyn mümkinçilik bar bolan senelere tutumsyz ýagdaýda üýtgedip bilerler.
Kassalardan satyn alnan awiabiletleri yzyna gaýtarmak ýa-da uçuş senesini üýtgetmek üçin satyn alan ýerlerine ýa-da awiakompaniýanyň wekilhanalaryna ýüz tutmalydyrlar. Şeýle-hem awiakompaniýanyň resmi web sahypasynda ýa-da online platformalarynda satyn alynan awiabiletler yzyna gaýtarylan ýagdaýynda pul serişdeleri töleg geçirilen bank kartyna yzyna gaýtarylar. Ýolagçylara howa gatnawlaryň ýagdaýlary baradaky iň soňky maglumatlary awiakompaniýanyň resmi saýtyndan yzarlamak maslahat berilýär.
