Minskde Türkmenistanyň ilçisi bilen Germaniýanyň Belarusdaky wagtlaýyn ynanylan wekiliniň arasynda duşuşyk geçirildi
Türkmenistanyň Belarus Respublikasyndaky Ilçihanasynda Türkmenistanyň Adatdan daşary we Doly ygtyýarly ilçisi Nazarguly Şagulyýew bilen Germaniýa Federatiw Respublikasynyň Belarusdaky täze bellenen wagtlaýyn ynanylan wekili Katrin aus dem Zipeniň arasynda duşuşyk geçirildi. Nemes diplomatynyň sapary ikitaraplaýyn hem-de halkara gün tertibiniň giň toplumy boýunça netijeli pikir alyşmak üçin mümkinçilik döretdi. Taraplar Türkmenistan bilen Germaniýanyň arasyndaky gatnaşyklaryň oňyn ösüş depginini kanagatlanma bilen belläp, olaryň ykdysadyýetden we syýasatdan başlap medeni-ynsanperwer hyzmatdaşlyga çenli köpugurly häsiýetini aýratyn nygtadylar.
Duşuşygyň dowamynda Türkmenistanda “Garaşsyz, hemişelik Bitarap Türkmenistan – bedew batly at-myradyň mekany” diýen şygar bilen geçýän 2026-njy ýylyň many-mazmunyna aýratyn üns berildi. Nazarguly Şagulyýew myhmana bu şygaryň çuňňur many-mazmunyny düşündirip, onuň milli ösüşiň toplumlaýyn maksatnamasyny aňladýandygyny belledi. Bu ýerde ahalteke bedewiniň keşbi diňe bir asyrlarboýy dowam edip gelýän däplere hormat däl, eýsem çalt ösüşiň, tehnologiki täzelenişiň we ýurdumyzyň dünýä açyklygynyň nyşany hökmünde çykyş edýär. Ilçi bu şygaryň oňyn Bitaraplyk syýasatyna üýtgewsiz ygrarly bolan häzirki zaman Türkmenistanyň asyllylyk we maksada okgunlylyk ýörelgelerini beýan edýändigini aýtdy.
Duşuşygyň ahyrynda Nazarguly Şagulyýew Katrin aus dem Zipene ýylyň möhüm wakalaryna taýýarlyk barada maglumat berdi. Şolaryň iň esasysy Türkmenistanyň döwlet Garaşsyzlygynyň 35 ýyllygynyň baýramçylygy bolar. Şeýle hem Aşgabadyň özara bähbitli täze taslamalary durmuşa geçirmäge taýýar, ynamdar we açyk hyzmatdaş bolup galýandygy nygtaldy. Duşuşyk, hatda uzakdaky diplomatik meýdançalarda hem Türkmenistanyň gün tertibiniň işjeňliginiň saklanýandygyny we onuň ösüş nusgasyna Ýewropa hyzmatdaşlarynyň gyzyklanmasynyň yzygiderli artýandygyny görkezdi.
