ABŞ-nyň VIP awia düzümi nusgawy keşbini Donald Trampyň saýlan reňkleri bilen çalşar
ABŞ-nyň hökümeti prezident awiaparkynyň daşky keşbini uly gerimde täzelemäge başlady. Jon Kennediniň döwründen bäri meşhur bolan açyk mawy reňk geçmişde galyp, onuň ýerini Donald Tramp tarapyndan teklip edilen täze reňk öwüşgini tutýar.
ABŞ-nyň Harby Howa Güýçleri ýurduň ýokary ýolbaşçylarynyň uçarlarynyň, şol sanda esasy "1-nji Bort" (Air Force One) uçarlarynyň dizaynynyň üýtgedilendigi resmi taýdan tassyklandy. Täze palitrada indi goýy gök, doýgun gyzyl we altyn reňkler bar. Bu çözgüt Donald Trampyň ilkinji prezidentlik möhletinde öňe süren başlangyjyny ýaňadan dikeldýär.
Ozal Jo Baýdeniň administrasiýasy tehniki kynçylyklara salgylanyp, bu taslamany ýatyrypdy, ýöne indi boýag işleri resmi taýdan başlandy. Amal uçarlaryň meýilleşdirilen tehniki hyzmaty wagtynda, tapgyrlaýyn amala aşyrylýar.
Täze keşbi ilki bilen wise-prezidenti we birinji hanymy gatnadýan "2-nji Bort" diýlip atlandyrylýan "Boeing C-32" uçarlary alýar. Şeýle uçarlaryň ilkinjileri Tehasdaky zawodda görülipdir.
Mundan başga-da, Katar döwletiniň sowgady bolan iň täze "Boeing 747-8i" uçary häzirki wagtda döwrebaplaşdyrylyşdan geçýär. Onuň 2026-njy ýylyň tomsuna prezident flagmany hökmünde uçuşlara taýýar boljakdygyna garaşylýar. Geljekde gurlýan täze nesil "Boeing" ägirtleri hem Donald Trampyň teklip eden dizayny bilen üpjün ediler.
Nusgawy asman mawy reňk 60 ýyldan gowrak ulanylýardy. Ol 1962-nji ýylda Žaklin Kennediniň haýyşy boýunça döredilipdi we Amerikan diplomatiýasynyň dünýä nusgasyna öwrülipdi.
Tomaşaçylar üçin bu keşbiň üýtgemegi diňe bir kosmetiki abatlamak däl-de, eýsem täze syýasy döwrüň alamatydyr. Dünýäde iň tanalýan uçaryň täzelenen görnüşi täze administrasiýanyň wizual özboluşlylygynyň üýtgemegini açyp görkezýär.
ORIENT
