Türkmenistanyň Belarusdaky ilçisi we RF-iň GDA-daky täze Hemişelik wekili umumy gün tertip barada maslahatlaşdylar
Minskde Türkmenistanyň Belarusdaky ilçisi Nazarguly Şagulyýew bilen Russiýa Federasiýasynyň GDA-nyň tertipnamalaýyn edaralarynyň ýanyndaky täze Hemişelik wekili Aleksandr Lukaşewiçiň duşuşygy boldy. Dialogyň merkezinde — Aşgabadyň Arkalaşykdaky başlyklygynyň ileri tutulýan ugurlary we Türkmenistanyň Garaşsyzlygynyň 35 ýyllygyna görülýän taýýarlyk işleri boldy.
Belerusdaky türkmen diplomatik wekilhanasynda geçirilen duşuşyk diňe bir tanyşlyk häsiýetinde bolmady — Russiýanyň täze Hemişelik wekili Aleksandr Lukaşewiç ilkinji resmi saparlarynyň biri üçin hut Türkmenistanyň Ilçihanasyny saýlap aldy. Bu ýagdaý, Türkmenistanyň 2026-njy ýylda başlyklyk wezipesini ýerine ýetirýän GDA-nyň häzirki gurluşynda Aşgabadyň aýratyn ornuny nygtaýar.
Söhbetdeşligiň dowamynda Nazarguly Şagulyýew kärdeşine 2026-njy «Garaşsyz, baky Bitarap Türkmenistan – bedew batly at-myradyň mekany» diýen milli şygarynyň çuňňur simwoliki manysyny açyp görkezdi.
Türkmenistan üçin GDA-da başlyklyk ediji hökmünde ahalteke bedewiniň keşbi diňe bir meňzetme däl-de, eýsem ýurduň daşary syýasat ugrunyň — asyllylygyň, okgunlylygyň we dialoga açyk bolmak bilen bir hatarda däplere wepalylygyň beýanydygy bellenildi. Bu ýörelgeler Türkmenistanyň döwlet Garaşsyzlygynyň 35 ýyllygy mynasybetli şu ýyl meýilleşdirilen ähli baýramçylyk çäreleriniň esasyny düzýär.
Diplomatlar halkara hyzmatdaşlygynyň giň gerimli meselelerini ara alyp maslahatlaşdylar we sebit durnuklylygyny üpjün etmek üçin GDA-nyň esasy meýdançalarynda Türkmenistan bilen RF-niň arasyndaky gatnaşyklary berkitmäge aýratyn üns berdiler.
Aleksandr Lukaşewiç türkmen tarapyny ýetip gelýän Garaşsyzlygyň 35 ýyllygy bilen gutlady hem-de Russiýanyň Türkmenistanyň Arkalaşygyň çäklerindäki giň gerimli başlangyçlaryny amala aşyrmaga işjeň ýardam bermäge taýýardygyny tassyklady. Şeýle-de, ol Türkmenistanyň başlyklyk döwrüniň esasyny düzjek uzak möhletleýin taslamalary goldaýandygyny bildirdi.
Minskidäki dialog şuny tassyklady: 2026-njy ýylda Türkmenistan diňe bir gepleşikler meýdançasy hökmünde däl-de, eýsem taryhy mirasy we uly meýilnamalary birleşdirip, GDA-nyň çäklerindäki hyzmatdaşlygy hil taýdan täzelemegiň başlangyjy hökmünde çykyş edýär.
