Si Szinpin: Hytaý ABŞ bilen gatnaşyklaryny pugtalandyrmaga taýýar
Hytaý Halk Respublikasynyň Başlygy Si Szinpin hepdäniň çarşenbe güni Amerikanyň Birleşen Ştatlarynyň prezidenti bilen telefon arkaly geçiren söhbetdeşliginde Hytaý – ABŞ gatnaşyklaryny durnukly we iki tarapa bähbitli ugurda ösdürmekde Amerikanyň Birleşen Ştatlarynyň prezidenti Donald Tramp bilen işleşmäge taýýardygyny aýtdy.
Si Szinpin Hytaý Halk Respublikasynyň Amerikanyň Birleşen Ştatlary bilen gatnaşyklaryna ýokary baha berýändigini aýtdy we geçen ýyl iki tarapyň arasynda aragatnaşygyň oňyn dowam etdirilendigini, şol sanda Busan şäherinde üstünlikli geçirilen duşuşygyň ikitaraplaýyn gatnaşyklaryň ugruny kesgitlemäge itergi berendigini belledi. Ol deňhukuklylyk, birek-birege hormat goýmak we özara bähbitlilik esasynda hyzmatdaşlygyň meselelerini çözmäge ýardam etjekdigini aýtdy.
Si Szinpin 2026-njy ýylda iki ýurduň hem ileri tutulýan ugurlarynyň bardygyny, şol sanda Hytaýyň 15-nji bäş ýyllyk maksatnamasyna girişilmegini we Amerikanyň Birleşen Ştatlarynyň garaşsyzlygynyň 250 ýyllygyny bellýändigini aýdyp, dialogy güýçlendirmegi, çaprazlyklary dogry dolandyrmagy we hyzmatdaşlygy giňeltmegi nygtady.
Si Szinpin Taýwan meselesiniň Hytaý-ABŞ gatnaşyklarynda wajyp meseledigini nygtady we Hytaýyň özygtyýarlylygyny goramak baradaky garaýşyny tassyklady we Taýwana ýarag satmakda Amerikanyň Birleşen Ştatlaryny paýhasly çemeleşmäge çagyrdy.
Amerikanyň Birleşen Ştatlarynyň prezidenti Donald Tramp ABŞ – Hytaý gatnaşyklarynyň örän möhümdigini aýdyp, Hytaý Halk Respublikasynyň Başlygy Si Szinpine uly hormat goýýandygyny we dialogy hem-de hyzmatdaşlygy dowam etdirmäge taýýardygyny mälim etdi. Ol Hytaýyň Taýwan meselesinde tutýan ornuna düşünýändigini we özüniň prezident wezipesinde işleýän döwründe ikitaraplaýyn gatnaşyklaryň durnukly bolmagyna umyt edýändigini aýtdy.
