Türkmenistan MICS7 hasabatynyň netijelerini hödürledi: çagalaryň hukuklaryny goramakda täze tapgyr
4-nji fewralda Aşgabatda Türkmenistanyň Statistika baradaky Döwlet komiteti ÝUNISEF bilen bilelikde Klaster barlagynyň ýedinji tapgyrynyň (MICS7) netijelerini tanyşdyrdy. Bu hasabat ýurtda çagalaryň we zenanlaryň durmuş şertleri barada esasy durmuş görkezijilerini öz içine alýan iň giňişleýin maglumat çeşmesi boldy.
Türkmenistan MICS atly global maksatnama 1995-nji ýyldan bäri gatnaşyp gelýär. Häzirki, ýedinji tapgyryň üstünde işler 2022-nji ýyldan bäri alnyp baryldy. Ol hünärmenleri taýýarlamak, 2024-nji ýylda tutuş ýurt boýunça maglumatlary ýygnamak we netijeleriň jikme-jik seljerilmegini öz içine aldy. Taslama Ýewropa Bileleşiginiň we ÝUNFPA-nyň goldawy bilen amala aşyryldy.
Bu raýatlar üçin näme üçin möhümdir? Barlagyň netijeleri diňe sanlardan ybarat däl. Olar aşakdaky ugurlar boýunça anyk ýagdaýy görkezýär:
• Saglyk we iýmitleniş: lukmançylyk hyzmatlarynyň elýeterliligine we iýmit hiline baha bermek;
• Bilim: çagalaryň okuwa gatnaşmagynyň derejesi we bilimde gazanýan üstünlikleri baradaky maglumatlar;
• Hukuklaryň goragy: döwlet tarapyndan aýratyn üns berilmegi talap edilýän ugurlary ýüze çykarmak.
Bu maglumatlar hökümete takyk çözgütleri kabul etmäge — maýa goýumlaryny nirede jemlemelidigini, haýsy durmuş ugurly maksatnamalary güýçlendirmelidigini we her bir maşgalanyň bähbitlerini has netijeli goramagy meýilleşdirmäge mümkinçilik berýär.
MICS7 maksatnamasynyň üstünlikli durmuşa geçirilmegi milli hünärmenleriň ýokary hünär derejesini tassyklady. Gazanylan tejribe geljekki gözegçilik tapgyrlary — MICS8 we MICS Plus üçin berk binýat bolar. Bu bolsa Türkmenistanda çagalaryň ýagdaýyny gowulandyrmak boýunça işleriň hakyky maglumatlara we halkara standartlara esaslanyp dowam etdiriljekdigini kepillendirýär.
Doly hasabat we seljeriş maglumatlary ÝUNISEF-iň resmi portalynda elýeterlidir.
ORIENT
