Si Szinpin geljegiň pudaklaryny ösdürmekde täze öňegidişlikleri ündeýär
Hytaý Halk Respublikasynyň Başlygy Si Szinpin ýurtda geljegiň pudaklaryny ösdürmekde artykmaçlyklardan peýdalanmaga we yzygiderli täze öňegidişlikleri gazanmagy ündedi.
Si Szinpin hepdäniň anna güni Hytaý Kommunistik Partiýasynyň Merkezi Komitetiniň Syýasy Býurosynyň toparlaýyn okuw mejlisinde çykyş etdi. Ol ylymda, tehnologiýada we senagatda bäsdeşlik artykmaçlygyny pugtalandyrmak, täze hilli öndürijilik güýçlerini ösdürmek, döwrebap senagat ulgamyny döretmek hem-de ilatyň ýaşaýyş derejesini ýokarlandyrmak üçin geljegiň pudaklaryny ösdürmegiň uly ähmiýetiniň bardygyny belledi.
Si Szinpin geljegiň pudaklarynyň öňden görüjilikli we strategik häsiýete eýedigini belläp, olaryň ylmy taýdan meýilleşdirilmeginiň we toplumlaýyn utgaşykly ösdürilmeginiň zerurdygyny aýtdy. Şeýle hem geljekki, täze döreýän we adaty pudaklaryň biri-biriniň üstüni ýetirmegini üpjün etmek üçin senagat hyzmatdaşlygyny güýçlendirmäge çagyrdy.
Ylmy-tehnologik innowasiýanyň wajyp ornuny belläp, Si Szinpin esasy tehnologiýalar boýunça täzeçilligi gazanmak we ylymda gazanylan netijeleriň önümçilige ornaşdyrylmagyny tizleşdirmek üçin mümkinçilikleriň giňden ulanylmalydygyny aýtdy. Ol kärhanalaryň innowasiýalaryň esasy hereketlendirijisi hökmünde ornuny güýçlendirmegi we öňdebaryjy ýokary tehnologiýaly kompaniýalary döretmegiň möhümdigini belledi.
Si Szinpin şeýle hem degişli syýasy goldawynyň güýçlendirilmegini, maliýe we salgyt ulgamlarynyň kämilleşdirilmegini, ylmy-tehnologiki maliýäniň ösdürilmegini hem-de işgärleri taýýarlamak işlerine bat bermelidigini nygtady. Ol ösüş bilen howpsuzlygyň arasyndaky deňagramlylygy üpjün etmegiň we halkara hyzmatdaşlygyny çuňlaşdyrmagyň möhümdigini belläp, ýolbaşçylary öňdebaryjy tehnologiýalar we ählumumy ösüş ugurlary boýunça bilimlerini artdyrmaga çagyrdy.
