Türkmen talyplary Özbegistanda geçirilen halkara bäsleşiklerde ýokary netijeleri görkezdiler
25-28-nji ýanwar aralygynda Özbegistanyň Buhara Döwlet Uniwersitetinde talyp ýaşlar üçin uly intellektual bäsleşikler, ýagny BIMO: Halkara Matematika Olimpiadasy-2026 we BIChO-2026: Halkara Himiýa Olimpiadasy geçirildi. Bu barada Türkmenistanyň Bilim ministrligi habar berýär.
Geçirilen bu halkara olimpiadalar türkmen talyplary üçin üstünlikli tamamlandy. Türkmenistanyň ýokary okuw mekdepleriniň talyplary ajaýyp netijeleri görkezip jemi 46 medal (17 altyn, 17 kümüş we 12 bürünç) gazandylar.
Halklara bäsleşiklere Özbegistan, Türkmenistan, Russiýa, Hytaý, Hindistan, Pakistan, Azerbaýjan, Iordaniýa we Täjigistan ýaly 10-dan gowrak ýurtdan 500-den gowrak talyp we 100 topar gatnaşdy.
Olimpiadanyň tapgyrlary
Şahsy tapgyr: Talyplar matematika we himiýa dersleri boýunça çylşyrymly meseleleri çözüp, şahsy bäsleşdiler.
Toparlaýyn tapgyr: Gatnaşyjylar öz bilim edaralaryny wekilçilik edip, toparlarda öz üstünliklerini görkezdiler.
BIMO (Matematika)
Matematiki analiz: çäkler, seriýalar we dogry däl integrallar.
Çyzykly algebra: matrisalar, determinantlar we çäkli ölçegli giňişlikler.
San teoriýasy we Kombinatorika: bölünýänlik meseleleri we grafikler.
BIChO (Himiýa)
Organiki däl himiýa: Geçiş metallarynyň we çylşyrymly birleşmeleriň himiýasy.
Organiki himiýa: Reaksiýa mehanizmleri we sintez zynjyrlary.
Fiziki himiýa: Termodinamika, Kinetika we Elektrohimiýa.
Bäsleşigiň özünden başga-da, talyp ýaşlar dünýäniň dürli künjeginden umumy gymmatlyklary paýlaşýan talyplar bilen duşuşmak mümkinçiliginden has täsirlendiler we bu diňe bir olaryň matematika ýa-da himiýa ukyplarynyň synagy däl, eýsem dostlukly gatnaşyklary ýola goýmak üçin hem mümkinçilik boldy. Mundan başga-da, gatnaşyjylar Buharanyň taryhy ýadygärliklerine gezelenç etdiler.
Şeýle-de bu bäsleşikleriň dowamynda professorlara we mugallymlara takyk ylymlary öwretmek usullary boýunça tejribe alyşmak üçin hem mümkinçilikler döredildi.
Bäsleşikleriň guramaçylary, adatça, öz aýratynlyklaryny goşmak bilen, halkara ýaryşlarynyň, ýagny matematika boýunça IMC we himiýa boýunça IChO ýaly halkara olimpiadalarynyň ülňülerine eýerýärler.
ORIENT
