OpenAI ylmy barlaglar üçin Prism platformasyny tanyşdyrdy
OpenAI kompaniýasy Prism atly platformanyň işe girizilendigini resmi taýdan yglan etdi. Bu — akademiki jemgyýetçiligiň, alymlaryň we talyplaryň zerurlyklary üçin ýörite taýýarlanan mugt iş giňişligidir. Eger 2025-nji ýyl emeli aňyň programmirleme pudagynda uly ösüş getiren döwri bolan bolsa, onda häzirki ýyl işläp düzüjileriň meýline görä düýpli we amaly barlaglar üçin öwrülişik ýyly bolmaly.
Intellektual köpçüligiň islegine jogap
OpenAI-niň statistikasy çylşyrymly ugurlara bolan gyzyklanmanyň ägirt uly derejede artandygyny görkezýär: her hepde ChatGPT takyk ylymlar we matematika boýunça 8,4 milliondan gowrak çylşyrymly soragy işleýär. Soňky bir ýylyň dowamynda şeýle ýüzlenmeleriň möçberi 50% artdy we 1,3 million işjeň gözlegçi-ulanyjydan ybarat esasy topar emele geldi. Olar üçin adaty çat-botdan has kämil gural zerur boldy.
Prism ylmy iş prosesinde nämäni üýtgedýär?
Platforma ylmy işleriň taýýarlanyşynda iň köp zähmet talap edýän tehniki meseleleri öz üstüne alýar:
• Akylly formatlaşdyrma: tekstleri awtomatiki tertiplemek we çylşyrymly diagrammalary ýörite bellik dillerini (mysal üçin, TikZ) öwrenmezden döretmek.
• Çeşmeler bilen işlemek: degişli neşirleri dessine tapmak we ilkinji çeşmelere göni salgylanma bilen bibliografik sanawlary awtomatiki düzmek.
• Akademiki kömekçi: mugallymlar üçin gurluşly umumy sapaklaryň meýilnamalaryny we gözegçilik tabşyryklaryny döretmek.
Prism-iň esasy maksady — ylmy-barlagçylary “tehniki artykmaç işlerden” boşadyp, olaryň ünsüni gipotezalary barlamaga we maglumatlary seljermäge gönükdirmekdir. OpenAI gündelik işleriň tizleşdirilmeginiň dünýä ylmy açyşlarynyň depginini ýokarlandyrjakdygyna bil baglaýar.
Prism-iň işe girizilmegi täze çemeleşmäniň başlandygyny görkezýär: emeli aň diňe “akylly gürrüňdeş” bolmagyndan çykyp, ýöriteleşdirilen inženerçilik gurşawyna öwrülýär. Ylmy jemgyýet üçin bu maglumat gözlemekden awtomatlaşdyrylan bilim sintezine geçmegi aňladýar.
ORIENT
