iPhone 18 Starlink hemralary bilen göni birikmäni alar
Orient Tehnologiýalar | Siz dünýäniň islendik künjeginde — Wi-Fi we öýjükli aragatnaşyk bolmazdan hem internetden peýdalanmak islärdiňizmi? Apple we SpaceX iPhone ulanyjylary üçin hakyky öwrülişik taýýarlaýar. iPhone 18 Pro we iPhone 18 Pro Max smartfonlary goşmaça enjamsyz Starlink hemra internetine göni birigip bilerler.
Häzirki wagtda Apple hemra arkaly Emergency SOS hyzmaty üçin Globalstar ulgamyny ulanýar. Bu hyzmat öýjükli torlaryň çäginden daşarda-da gyssagly gulluklar bilen habarlaşmaga mümkinçilik berýär. Emma giňelýän Starlink ulgamy täze mümkinçilikleri açýar. Apple SpaceX bilen göni hemra birikmesini ornaşdyrmak boýunça gepleşikler geçirýär.
Bloomberg we The Information neşirleriniň maglumatlaryna görä, geljekki iPhone modelleri 5G Non-Terrestrial Network tehnologiýasyny goldap biler. Bu bolsa hemralary aragatnaşyk çägini giňeltmek üçin ulanmagy üpjün eder. Şeýle hem işläp düzüjiler üçin API hödürlenip, hemra aragatnaşygyny üçünji tarap programmalaryna goşmaga ýol açar.
SpaceX Starlink taslamasynyň ornuny güýçlendirýär — kompaniýa ikinji nesil 15 müň hemrany ýerleşdirmek üçin rugsat aldy. Bu hemralar has ýokary geçirijilik ukybyny, pes gijä galmany we adaty smartfonlar bilen göni birikmäni üpjün edýär.
Ulanyjylar üçin bu — uzak sebitlerde we syýahat wagtynda has durnukly internet diýmekdir. Goşmaça enjamy birikdirmek zerurlygy bolmaz.
Apple adatdaky dizaýn we amatlylyk ýörelgesini saklar: hemra aragatnaşygy ulanyjy üçin mümkin boldugyça “görünmez” görnüşde işlär. Starlink arkaly birikme mobil aragatnaşygyň çägini ep-esli giňelder.
Öň hem ýat çipleriniň ýetmezçiligi iPhone 18-iň bahasyna täsir etmejekdigi habar berildi. Diýmek, täze model adaty baha bilen elýeterli bolar.
iPhone 18 bilen dünýä has ýakyn bolar: hatda iň uzak ýerlerde-de ulanyjylar aragatnaşykda bolup, hatlaryny barlap, gürleşip we onlaýn işläp bilerler.
ORIENT
