Hytaý bilen Azerbaýjan strategik hyzmatdaşlygy pugtalandyrýar
Hytaýyň daşary işler ministri Wan Ýi hepdäniň çarşenbe güni Pekinde Azerbaýjanyň daşary işler ministri Jeýhun Baýramow bilen duşuşyk geçirdi.
Hytaýyň Kommunistik partiýasynyň Merkezi Komitetiniň Syýasy býurosynyň agzasy hem bolan Wan Ýi, Hytaý bilen Azerbaýjanyň gatnaşyklarynyň döwlet baştutanlarynyň strategik ylalaşyklaryna esaslanýan, ygtybarly we özara bähbitli hyzmatdaşlygyň ösdürilmelidigini belledi. Ol halkara derejesindäki ýagdaýlaryň üýtgäp durmagyna garamazdan, Hytaý döwletiniň Azerbaýjan bilen gatnaşyklaryna hemişe uzak möhletli strategik nukdaýnazardan çemeleşjekdigini aýtdy hem-de Hytaý Halk Respublikasynyň esasy milli bähbitlerine degişli meselelerde Azerbaýjanyň yzygiderli berýän goldawyna ýokary baha berdi.
Jeýhun Baýramow öz gezeginde Azerbaýjanyň Hytaý döwletiniň ösüşini tutuş dünýä üçin mümkinçilik hökmünde görýändigini, Hytaý Halk Respublikasynyň Başlygy Si Szinpin tarapyndan öňe sürlen dört sany ählumumy başlangyjy goldaýandygyny aýtdy. Şeýle hem ol Azerbaýjanyň “bir Hytaý” ýörelgesine ygrarlydygyny ýene-de bir gezek tassyklady we Ählumumy Dolandyryş boýunça Dostlar Toparyna goşulmaga taýýardygyny beýan etdi.
