Si Szinpin Wetnamyň lideri To Lam bilen telefon arkaly gepleşik geçirdi
Hytaý Halk Respublikasynyň Başlygy Si Szinpin hepdäniň duşenbe güni Wetnamyň Kommunistik partiýasynyň Merkezi Komitetiniň Baş sekretary To Lam bilen telefon arkaly gepleşik geçirdi. Hytaýyň Döwlet Baştutany To Lamy Wetnamyň Kommunistik partiýasynyň Merkezi Komitetiniň Baş sekretary wezipesine gaýtadan saýlanylmagy we Wetnamyň Kommunistik partiýasynyň XIV gurultaýynyň üstünlikli geçirilmegi bilen gutlady.
Si Szinpin Hytaý bilen Wetnamyň arasyndaky özara hyzmatdaşlygy pugtalandyrmalydygyny, strategik utgaşyklygy çuňlaşdyrmalydygyny hem-de ösüşi we döwrebaplaşmagy bilelikde öňe ilerletmelidigini aýtdy. Şeýle hem ol döwlet dolandyryşy, ösüş strategiýalary we halkara gatnaşyklary boýunça utgaşykly hyzmatdaşlygyň möhümdigini belläp, sosializmi goramak we adamzat jemgyýetini ösdürmek ugrunda bilelikdäki tagallalara çagyrdy.
Wetnamyň Kommunistik partiýasynyň Merkezi Komitetiniň Baş sekretary To Lam Hytaý liderine gutlaglary üçin minnetdarlyk bildirip, Hytaý – Wetnam gatnaşyklary boýunça kesgitlenen alty sany esasy maksatnamanyň çäginde hyzmatdaşlygy berkitmeklige Wetnamyň ygrarlydygyny tassyklady. Bu maksatnamalar syýasy ynamy pugtalandyrmagy, howpsuzlyk hyzmatdaşlygyny we köptaraplaýyn utgaşyklylygy öz içine alýar.
To Lam Wetnamyň “bir Hytaý” ýörelgesine ygrarlylygyny, şeýle-de “Bir guşak – bir ýol” başlangyjyny we Hytaý tarapyndan öňe sürlen ösüş, howpsuzlyk, medeniýet we dolandyryş boýunça başlangyçlary goldaýandygyny ýene bir gezek tassyklady. Iki ýurduň döwlet baştutanlary Täze ýyl mynasybetli birek-biregi gutlamak bilen, iki ýurduň halklaryna abadançylyk we rowaçlyk arzuw etdiler.
