Abu-Dabide dünýäde ilkinji “ösüşe görä tölegli” metallurgiýa parky açyldy
BAE-niň KEZAD ykdysady zolagynda bahasy 430 million dirhem bolan Metal Park atly innowasion taslama işe girizildi. Bu “ösüşe görä töleg” ýörelgesi boýunça işleýän dünýäde ilkinji senagat ekoulgamy bolup, öndürijilere iri başlangyç maýa goýumlary bolmazdan işini giňeltmäge mümkinçilik berýär.
Täze model senagata bolan çemeleşmäni düýpgöter üýtgedýär: maýalaşdyrmaga esaslanýan gurluş integrirlenen ulgam bilen çalşyrylýar. 450 müň inedördül metr meýdanda ýerleşýän kärhanalar önümçilik kuwwatlaryna, ammarlara we sargytlary hakyky wagt tertibinde dolandyrmaga mümkinçilik berýän sanly hyzmatlara dessine elýeterlilik alýarlar. AD Ports Group-yň goldawy netijesinde, parka gatnaşýanlar önümçilikden porta çenli üznüksiz logistika bilen üpjün edilýär.
Häzirki wagtda Metal Park-da 27 gatnaşyjy iş alyp barýar. Taslama ekologiýa durnuklylygyna we netijelilige gönükdirilendir: umumy serişdeleriň ulanylmagy çykdajylary azaldýar hem-de galyndylary iň az derejä ýetirýär. Parkyň açylmagy Abu-Dabiniň öňdebaryjy tehnologiýalaryň global merkezi hökmündäki ornuny tassyklaýar we senagat ösüşini halkara maýadarlar üçin elýeterli edýär.
ORIENT
