Sun Weýdun: Energetika, ulag we sanly ulgam — sebitiň özara baglanyşygynyň «polat üçburçlugy»
Aşgabat, 21-nji ýanwar | ORIENT. «Hytaý — Merkezi Aziýa» formatynyň Baş sekretary Sun Weýdunyň Aşgabatdaky SPECA hepdeligindäki çykyşy çuňňur üns bilen kabul edildi: ählumumy logistika zynjyrlarynyň bökdençliklere sezewar bolýan döwründe Pekiniň sesi tutuş sebit ykdysadyýeti üçin jaňyň sesi bolup ýaňlanýar.
Sun Weýdun SPECA-nyň Ykdysady forumynyň münberinden binýatlaýyn zatlar barada gürrüň etdi. Ol halkara gatnaşyklarynyň häzirki gurluşynyň «çuňňur özgerişleri» başdan geçirýändigine we bu çylşyrymly döwürde Türkmenistanyň özüniň hemişelik Bitaraplyk syýasaty bilen durnuklylygyň we ynanyşmagyň seýrek duş gelýän adasy bolup galýandygyna aýratyn ünsi çekdi.
Diplomat sebitdäki ylalaşygy pugtalandyrmakda Aşgabadyň ornuny aýratyn belledi we türkmen tarapynyň başlyklyk etmeginde SPECA-nyň maksatnamasynyň maýadarlaryň garaşýan «anyk mazmun» bilen üstüniň ýetirilendigini nygtady — sanly özgerişden başlap, hakyky logistika geçelgelerine çenli.
Soňra bolsa, forumyň meýdançasynyň çäklerinde bu diplomatik jümleleriň aňyrsynda aslynda nämeleriň ýatandygy barada gürrüň gozgaldy. Bu ýerde, şahsy söhbetdeşlikde Sun Weýdun öz pikirini has-da çuňlaşdyrdy. Ol ummana çykalgasy bolmadyk biziň sebitimiziň ýurtlary üçin özara baglanyşygyň artykmaçlyk däl, eýsem ýaşamak we halkara derejesinde bäsdeşlige ukyplylyk meselesidigini düşündirdi.
«Bilýäňizmi, — diýip diplomat oýlandy, — biz köplenç karta seretýäris we «geografiki çatrygy» görýäris. Ýöne biziň wezipämiz — ony «ösüş düwnüne» öwürmekdir». Edil şu ýerde ol «polat üçburçluk» kesgitlemesini ulandy. Sun Weýdun onuň düzüm böleklerini jikme-jik düşündirdi:
Energetika — bu sebiti iýmitlendirýän «ýürekdir»;
Ulag — bu çykdajylary azaldýan «damardyr»;
Sanlylaşdyrmak — bu söwdany aýdyň we durnukly edýän «nerw ulgamydyr».
Forumyň çäklerinde “Ýyldyz” myhmanhanasynyň eýwanyndaky söhbetdeşlikde bir zat aýan boldy: «Hytaý — Merkezi Aziýa» formaty diňe bir SPECA-nyň üstünliklerine syn etmän, eýsem, bu integrasiýanyň esasy hereketlendirijisine öwrülmäge taýýardyr.
Myhman öz pikirini jemläp, «biziň formatymyzyň ruhy» — bu ilki bilen özara ynanyşmakdygyny nygtady. Aşgabadyň bu çylşyrymly amallary nähili işjeň dolandyrýandygyny nazara alyp, Sun Weýdun sebitiň açyk we durnukly arhitekturasynyň indi diňe bir arzuw däl-de, eýsem, şu ýerde we şu wagt gurlýan ýakyn geljekdigine ynam bildirdi.
