Aşgabatda suratkeş Berdiguly Amansähedowy gutladylar
Türkmenistanyň Suratkeşler birleşiginiň sergi zalynda ussat suratkeş Berdiguly Amansähedowyň 75 ýaş ýubileýine bagyşlanan «Çölüň aýdymlary» atly giň gerimli sergisi açyldy. Bu çäre diňe bir 110-dan gowrak özboluşly eseriň görkezilmegi bilen däl-de, eýsem suratkeşiň medeniýetleriň arasyndaky halkara dialoga goşan goşandynyň dabaraly taýdan ykrar edilmegi bilen hem tapawutlandy.
ТАSS agentliginiň habar bermegine görä, serginiň açylyş dabarasynyň dowamynda Russiýanyň Türkmenistandaky Adatdan daşary we Doly ygtyýarly ilçisi Iwan Wolynkin ýubileý eýesine «Watandaş» diýen Hormat nyşanyny gowşurdy. Bu sylag — Amansähedowyň iki ýurduň arasynda döredijilik gatnaşyklaryny berkitmek ugrunda köp ýyllaryň dowamynda alyp baran işiniň ykrar edilmegidir.
Moskwadaky meşhur Surikow adyndaky institutda bilim alan ussat, döredijiliginde rus akademik sungat mekdebini Gündogaryň çuňňur filosofiýasy we türkmen çölüniň baý reňkleri bilen ussatlyk bilen utgaşdyrýar.
Berdiguly Amansähedow — özboluşly şahsyýetdir. Ol suratkeş we kitap grafikçysy, kino hem-de teatr suratkeşi hökmünde giňden tanalýar. Andreý Platonowyň eseri boýunça goýlan «Jan» spektaklyndaky wizual çözgüdi teatr dünýäsi üçin hakyky açyş boldy. Onuň eserleri dünýäniň köp ýurtlarynda hususy ýygyndylarda saklanýar.
«Çölüň aýdymlary» atly sergi suratkeşiň döredijilik ýolunyň retrospektiwasy boldy. Ýakynda onuň eserleri BRICS sammitiniň çäginde Kazanda üstünlikli görkezildi, häzirki wagtda bolsa aşyabatlylar ussadyň grafikasy we surat eserleri bilen göni tanyş bolup bilerler. Bu eserlerde Garagumyň baky rowaýatlary we suratkeşiň çuň filosofik oýlanmalary beýan edilýär.
«Berdiguly Goşaýewiç — Russiýa bilen berk baglanyşykly we dünýäniň köp ýurtlarynda ykrar edilen adamdyr. Onuň 2024-nji ýylda Kazandaky sergisi uly üstünlik bilen geçirilip, dünýä derejesindäki ussatlygyny ýene bir gezek tassyklady», — diýip, ТАSS rus diplomatyň sözlerini getirýär.
