Hytaý 2026–2030-njy ýyllarda eksporty we importy ösdürmeklgi meýilleşdirýär
Hytaý 2026–2030-njy ýyllary öz içine alýan 15-nji bäşýyllyk maksatnamanyň çäginde daşary söwda ulgamynda innowasion ösüşe itergi bermek hem-de eksport bilen importyň arasynda deňagramlylygy saklamak maksady bilen täze çärelerini durmuşa geçirer. Bu barada Hytaýyň Baş Gümrük Gullugy habar berdi.
Hytaýyň Baş Gümrük Gullugynyň ýolbaşçysy Sun Meiszýun, Pekinde geçirilen Milli gümrük iş maslahatyndaky çykyşynda, soňky bäş ýylda Hytaýyň gümrük edaralarynyň ýylda ortaça 5 milliard 200 million tonna möçberinde, umumy bahasy 42 trillion 300 milliard ýuana (ýagny 6 trillion ABŞ dollaryna) barabar bolan import-eksport harytlaryny dolandyrandygyny aýtdy. Bu möçber Hytaýyň söwda boýunça dünýäde iň öňdebaryjy ýurt hökmünde ornuny saklaýandygyny görkezýändir.
Sun Meiszýun gümrük edaralarynyň söwdany ýeňilleşdirmek bilen howpsuzlygy, şeýle hem eksport bilen importy deň derejede utgaşdyrmalydygyny belledi.
“Biz eksporty giňeltmek bilen bir hatarda importy hem artdyrmalydyrys we dünýäniň söwda dolanyşygyna gatnaşygymyzy çuňlaşdyrmalydyrys” diýip, Sun Meiszýun aýtdy.
Onuň sözlerine görä, 2026-njy ýylda halkara söwdasyny ýeňilleşdirmek boýunça täze çäreler durmuşa geçiriler. Şol sanda halkara elektron söwdasy, daşary ýurt ammarlary, pes belentlikdäki ykdysadyýet, bazar arkaly satyn alyş, gümrük gözegçiligindäki abatlaýyş, synag we gaýtadan önümçilik ugurlaryna goldaw güýçlendiriler.
Mundan başga-da, ýokary hilli oba hojalyk önümleriniň, azyk we sarp edijilik harytlarynyň importy üçin gözegçilik we karantin amallary kämilleşdiriler. Şeýle hem Hytaýyň Halkara Import Sergisi we Hytaýyň import we eksport boýunça Kanton ýarmarkasy ýaly iri halkara çärelerine hyzmat ediş güýçlendirilip, daşary söwdada durnukly ösüş gazanmak maksat edinilýär.
