Täjigistanda Türkmenistanyň Prezidentiniň täze kitabynyň tanyşdyryş dabarasy geçirildi
2025-nji ýylyň 24-nji dekabrynda Türkmenistanyň Täjigistan Respublikasyndaky Ilçihanasynda Hormatly Prezidentimiziň «Türkmenistanyň Bitaraplygy – parahatçylygyň we ynanyşmagyň aýdyň ýoly» atly kitabynyň tanyşdyrylyş dabarasyna bagyşlanan çäre geçirildi.
Bu çärä Täjigistanda kowçum bolup ýaşaýan türkmenleriň abraýly wekilleri, Täjigistanyň ýokary okuw jaýlarynda okaýan türkmen talyplary, intelligensiýanyň wekileri we Ilçihananyň işgärleri gatnaşdylar.
Onuň dowamynda Ilçihananyň işgärleri, Täjigistandaky türkmen jemgyýetiniň wekili A.Bekmyradow, Täjigistanyň Milli uniwersitetiniň professory H.Umarow, M.S.Osimi adyndaky Täjigistanyň Tehniki uniwersitetiniň tehniki kollejiniň halkara gatnaşyklar boýunça orunbasary Z.Häkimow, Rus-täjik slawýan uniwersitetiniň 3-nji ýyl talyby M.Atajanowa we başgalar çykyş etdiler.
Çärede çykyş edenler, türkmen, rus we iňlis dillerinde neşir edilen döwlet Baştutanymyzyň kitabynda türkmen Bitaraplygynyň geçen ýoly, BMG-synyň baş assambleýasy tarapyndan üç gezek ykrar edilen hemişelik Bitaraplygymyzyň ähmiýeti, dünýäde parahatçylygy we ynanyşmagy üpjün etmäge gönükdirilen taryhy başlangyçlary barada giňden beýan edilýändigi hem-de Bitarap Türkmenistanyň häzirki zaman diplomatiýasyny täze döwrüň şertlerine laýyklykda türkmen halkynyň taryhy mirasynyň dowamaty hökmünde häsiýetlendirip bolar diýip bellediler.
Soňra çäräniň ahyrynda 2025-nji ýylyň 21-nji noýabrynda Türkmenistanyň Inžener – tehniki we ulag kommunikasiýalary institutynda geçirilen “Türkmenistanyň durnukly ulag syýasatynyň halkara ulag-logistika hyzmatdaşlygyny pugtalandyrmakdaky orny” atly halkara ylymy-amaly maslahatyna gatnaşan Täjigistanyň Agrar uniwersitetiniň dosenti T.Kamolowa we M.S.Osimi adyndaky Täjigistanyň Tehniki uniwersitetiniň uly mugallymy A.Zokirzoda bu maslahata üstünlikli gatnaşandyklary üçin iberilen sertifikatlary gowşuryldy.
ORIENT
