“Hakyda göwheri”: Gurbanguly Berdimuhamedowyň kitabynyň azerbaýjan dilindäki neşiriniň tanyşdyrylyşy
Aşgabat, 22-nji dekabr | ORIENT. Şu gün Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň “Hakyda göwheri” atly kitabynyň azerbaýjan dilindäki neşiriniň tanyşdyrylyş dabarasy geçirildi.
Diplomatlary, iki ýurduň alymlaryny we parlamentarilerini bir ýere jemlän bu çäre, bilelikdäki ynsanperwer taslamalardan Merkezi Aziýada täze howpsuzlyk arhitekturasyna çenli Aşgabat bilen Bakuwyň arasyndaky dialogyň işjeňleşýändigini tassyklady.
Azerbaýjanyň Türkmenistandaky Ilçisi Gismat Gazalow öz çykyşynda iki ýurduň Liderleriniň arasyndaky ynamyň ýokary derejesini nygtap, birnäçe möhüm beýanaty etdi. Ilçi, hususan-da, 2025-nji ýylyň noýabr aýynda Daşkentde geçirilen sammitde Merkezi Aziýanyň döwlet Baştutanlarynyň konsultatiw duşuşyklaryna Azerbaýjanyň doly hukukly agza hökmünde kabul edilmeginde Gurbanguly Berdimuhamedowyň ornuny nygtady. Bu taryhy waka hakykat ýüzünde sebitleýin hyzmatdaşlygyň çäklerini giňeldýär.
Azerbaýjanyň Fizuli şäherinde türkmen halkynyň Milli Lideri tarapyndan başy başlanan metjidiň gurluşygy bellenildi. Şäheriň ýaşaýjylary bu ynsanperwer işi “umumy gymmatlyklara aýratyn hormat goýmagyň nyşany” diýip atlandyrdylar.
Ýakynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bilen Geýdar Aliýew adyndaky gaznanyň arasynda özara düşünişmek hakynda Ähtnama gol çekilendigi bellenildi. Bu bolsa ynsanperwer hyzmatdaşlygynda täze sahypany açýar.
“Bu eser diňe bir türkmen halky üçin däl, eýsem tutuş türki dünýäsi üçin ruhy hazyna öwrülen paýhas çeşmelrini öz içine alýar” – diýip, Ilçi Gismat Gazalow aýtdy.
ürkmenistanyň Daşary işler ministriniň orunbasary Mähri Bäşimowa eseriň ylmy taýdan gymmatlygyna ünsi çekdi. Türki medeniýetiň we mirasyň halkara gaznasynyň goldawy bilen terjime edilen kitapda Türkmenistan gadymy siwilizasiýalaryň ojagy hökmünde görkezilýär.
Kitap Türkmenistanyň häzirki zaman bitaraplyk ýörelgesiniň onuň milli taryhy we ruhy mirasy bilen aýrylmaz baglanyşyklydygyny görkezýär. Kitapda öňüni alyş diplomatiýasynyň ýörelgeleriniň gadymy döwürlerde sebitde kemala gelendigi baradaky özboluşly maglumatlar bar.
Azerbaýjan dilindäki “Hakyda Göwheri” neşiri – bu diňe bir terjime däl. Bu tanyşdyryşa gatnaşyjylaryň pikiriçe, gatnaşyklary häzirki wagtda “iň ýokary syýasy derejä” ýeten iki doganlyk halkyň arasyndaky çuňňur dialoga çakylykdyr. Azerbaýjan okyjylary üçin bu kitap türkmen bitaraplygyň ýörelgelerine we oguz mirasynyň baý taryhyny düşünmek üçin açar bolar.
